:: keipdúnkur atla bollasonar ::

:: miðvikudagur, apríl 30, 2003 ::

Ég get varla lýst ánægju minni með að vera uppáhaldsbloggari Katrínar. Ánægjulegt að fólki þyki í alvörunni gaman að lesa reglurnar um hvernig ég skipulagði plötusafnið mitt og fleira í svipuðum dúr.
\\
Mér finnst gaman að grína, og í tilefni að því vonast ég til að sem flestir setji eftirfarandi mynd upp á síðum sínum:


\\
Hér með er Oddur opinberlega ávíttur fyrir fátíð og slök blogg sl. vikur.

:: Atli 21:20 [+] :: ::
...

Í gærkvöldi fór fram stuttmyndakeppni NFMH, en þar sem ég var að hjálpa bágstaddri Svölu að læra fyrir lokapróf í efnafræði, þá komst ég því miður ekki. En að keppninni lokinni hringdi í mig Leó og tilkynnti mér að kvikmyndirnar Space Invaders I og Space Invaders II hefðu lent í öðru og fyrsta sæti. Ég og Leó erum einmitt höfundar þessa mynda. Svo af sex myndum sem voru að taka þátt urðu okkar tvær efstar. Við unnum tvöfalt. Í verðlaun hlutum við einhverja klippitíma og afnot af myndavél og áttum að vinna einhverja tippaklaka og einhvern standpínutippahring, en gaurinn í þriðja sæti fékk það víst. Myndirnar sköpuðu mikla umræðu og komu fram hinar og þessar túlkanir á hvað væri raunverulega í gangi, hvað vakti fyrir listamönnunum. Space Invaders I var m.a. túlkuð sem svona 50's geimmynd, en þær myndir voru einmitt tákn fyrir ótta Bandaríkjamanna við kommúnismann. Hvílík fífl. Space Invaders II var m.a. túlkuð sem saga af manni sem væri svo upptekinn að sjálfum sér að hvað sem aðrir gerðu þá tækist þeim aldrei að fanga athygli hans. Hvorki ég og Leó munum gefa upp hvað er satt í þessu öllu saman. Þá eigum við bara eftir að fullkomna þríleikinn og gefa þetta út á DVD. Eða eitthvað.
\\
Lið Dóra DNA, Gogga fola og Nasa sigraði MORTAR í gær. Umræðuefni lokakeppninnar var háalvarlegt að þessu sinni, samlokur og mældi sigurliði á móti. Í hinu liðinu voru Ugla, pervertinn Conrad James McGreal og birtingarmynd kvenhrokans; Elín. Dóri varð efstur, og þ.a.l. ræðumaður NFMH fram á næsta ár. Eða eitthvað.
\\
Ég er farinn að verða frekar spenntur fyrir Hróarskeldu, nú þegar sveitir einsog Yo La Tengo og Interpol og Íslandsvinirnir í Sigur Rós og Íslandsvinkonan Björk hafa ákveðið að mæta á svæðið. Svo hatar maður ekki að sjá Blur og Cardigans og Coldplay og Massive Attack og svona. Meistarinn Squarepusher ætlar líka að mæta, og það er sko ekkert djók. Við skulum bara vona að hann verði skemmtilegri svona á sviði heldur en Aphex Twin á Leeds fyrir ári síðan. Reyndar segir heimasíða hátíðarinnar að hann verði með live-set, svo ég er alveg frekar fokking spenntur. Eða eitthvað.
\\
Tel ástæðu til þess að mótmæla veðri dagsins. Einnig vil ég koma því á framfæri að mér fannst franska lautarferðar dimisjón atriðið mjög skemmtilegt, sérstaklega gaman að reiðhjólinu, og stelpurnar voru geðveikt sætar með svörtu hárkollurnar.

:: Atli 15:52 [+] :: ::
...

Katrín nokkur Björgvinsdóttir segir frá því í nýlegri færslu að hún hafi verið í sumarbústað í nokkurn tíma, og þegar hún hafi komið heim hafi húsið hennar verið bara örlítið frábrugðið því þegar hún fór. T.d. höfðu snyrtivörur verið fluttar til, engalstytta komin í ísskápinn, plaköt (reyndar ekki plakat, heldur „svolítið“) höfðu skipt um veggi o.fl. Þetta minnti mig óneitanlega á það þegar Orri var í burtu og ég og Leó brutumst inn til hans og gerðum bara smávægilegar breytingar á herberginu hans. Við snérum tölvuskjánum hans við, settum einhvern Iron Maiden disk upp á mjóan lista á veggnum inni hjá honum og settum stólinn hans hálfan inn í fataskáp. Svo fórum við. Þetta olli Orra mikllu hugarangri, í nokkrar vikur að ég held. Hann fékk þó að vita sannleikann að lokum. Síðan þá er þetta orðinn hálfgerður prívat-djók okkar á milli, við höfum endurtekið leikinn tvisvar sinnum. Í annað skiptið hengdum við upp risastóran hakakross yfir gluggann inni hjá honum; og um daginn vorum við ásamt Ásgeiri í góðu flippi og brutumst inn til Orra. Við settum stól inn á klósett, rúlluðum öllum teppunum hans upp og settum upp í rjáfur, og settum Beastie Boys á fullt blast. Sjálfir földum við okkur uppí skáp. Orri dó næstum því úr hlátri þegar hann kom heim.

:: Atli 18:56 [+] :: ::
...

Ég var að hugsa, þegar fyrsta kvikmyndin var gagnrýnd, hvað ætli hún hafi fengið í einkunn á skalanum 1-10? Sko: þetta var náttúrulega algjört undraverk, annað eins hafði aldrei sést, svo hún ætti í raun að fá 10; en um leið gæti myndin hafa verið ekkert sérstök, og hvað á þá að gera? Gagnrýnandinn hafði jú enga viðmiðun; var þetta leiðbeinandi verk, myndu allar kvikmyndir framtíðarinnar vera miðaðar við þessa? Ef svo væri ætti hún að fá 5 og síðan yrði unnið út frá því. Þetta hefur valdið mér nokkru hugarangri.
\\
Ég er búinn að lóðsa inn plötusafninu mínu, einsog BK myndi orða það. Ég á þó eftir að gefa öllum plötunum einkunn, og á sumum var hörgull á útgáfuupplýsingum, oft þurfti ég að giska á ártal. Endilega leiðréttið mig ef þið vitið betur.
Nokkrar athugasemdir varðandi safnið og uppsetningu þess á stafrænu formi:
1. Safnið nær einungis yfir það sem ég á til á keyptum, verksmiðjuframleiddum geisladiskum. Að þessu frátöldu á ég einnig þó nokkurt safn vínylplatna og nokkra heimabruggaða diska.
2. Ég ákvað að láta einungis þá diska fljóta með sem eru í minni eigu. Nokkrir diskar í safni mínu eru í eigu foreldra minna, systkina eða vina; þó svo að þeir ali manninn (svo að segja) í hillunni minni. Þó tel ég fram diskinn Peel Session 2 með Autechre, en hann er í eigu bróður míns; og Snatch með Howie B, en hann er í eigu Adda litla. Ég held að það séu einu undantekningarnar.
3. Diskunum er raðað eftir stafrófsröð flytjanda. Reynt er að hafa þá reglu þegar um er að ræða flytjendur sem kallast eigin nöfnum, að íslenskum flytjendum sé raðað eftir fyrra nafni, en útlendum eftir seinna nafni. Erfitt er að dæma um hvort t.d. John B., fer undir J eða B. Ég ákvað þó að þegar einungis er um einn staf að ræða, skuli raðað eftir fyrra nafni. Einnig er ekki alltaf víst hvort um sé að ræða raunverulegt nafn, t.d. Ms. John Soda, en þann titil ákvað ég að setja undir M, frekar en J eða S. Slík deilumál eru leyst ein og sér.
4. Því næst er raðað eftir útgáfuröð platna. Oft má þó halda annað skv. útgáfuupplýsingum, en þær taka oft aðeins mið af endurútgáfum o.þ.h. T.d. þarf varla að tíunda það að Wish you were here kom út á áttunda áratugnum en ekki 1992.
5. Á listann vantar allar smáskífur Prodigy (að undanskilinni Baby's got a temper, en þær keypti ég í 12 ára bekk. Einnig vantar nokkrar aðrar smáskífur.
6. Rather Interesting er í raun ekki flytjandi heldur útgáfufyrirtæki. En á þessu fyrirtæki gefur aðeins út einn maður, Atom Heart™, en hann er þó sjaldnast skrifaður fyrir plötunum.

Ég vona að þetta hafi ekki verið mjög leiðinleg lesning.
Plötusafnið má sjá hér. Athugið þó að skjalið er um 500K sökum slælegrar forritunar, og ráðlegg ég því mótaldsnotendum að vera þolinmóðir.
\\
Að máli við mig kom Hildigunnur nokkur í dag og bað mig að krækja í sig. Gjörðu svo vel: skirdie.blogspot.com

:: Atli 18:03 [+] :: ::
...

Þetta hefur verið alveg furðulegur dagur. Mér finnst ég ekki hafa gert neitt. Bókstaflega ekkert. Svona einsog að svífa um innan í svartholi. Jújú, ég lauk við sólóið yfir Stella by Starlight sem ég á að skila í hljómfræði á morgun, og ég...ég...ég horfði á MTV í smástund, og...ég...var á Netinu alveg geðveikt lengi, aftur og aftur. Ég hafði svo lítið að gera, kæru lesendur, að ég setti plötusafnið mitt upp á töfluformi í html-i á tveimur klukkustundum, svona í stíl við keipdúnkinn - rauðir og gulir litir. Þegar það er tilbúið mun ég setja það inn sem órjúfanlegan hluta keipdúnksins, enda segir plötusafn manna meira til um viðkomandi heldur en þúsund orð, eða það las ég einhversstaðar.
\\
Upp hafa á ný blossað ómálefnalegar stjórnmálalegar umræður á nfmh.is. Alltaf gaman að því, enda lítið vit í málefnalegri umræðu.
\\
Kannski ég segi ykkur frá nýstofnuðum drykkjuklúbbi sem ber vinnuheitið Heiðrún. Pælingin að baki klúbbnum er sú að þar hittist drengir úr mismunandi áttum, sem allir eiga það sameiginlegt að vera góðir á því. Hann er skipaður sex drengjum, þrem pörum í rauninni, þ.e.a.s. tveir og tveir þekkjast vel, en pörin þrjú þekkjast miklu minna sín á milli. Í klúbbnum eru: Atli Bollason og Orri Jökulsson, Oddur Ástráðsson og Bragi Málefnalegi, Baldur Kristjánsson og Þorvaldur Davíð. Hinir tveir síðastnefndu vita reyndar ekki enn að þeir séu í klúbbnum, en þeir geta farið að hlakka til því stofnfundurinn verður að öllum líkindum 23. maí nk. En svo er það tvistið....sko, á hvern fund verður fenginn einn gestur, sjöundi maðurinn, oddamaður, sérstakur heiðursgestur; og sá er breytilegur á hverjum fundi (ég reikna með u.þ.b. sex fundum á ári). Fundirnir verða langir og strangir en umfram allt ánægjulegir. Ég hlakka til. Ef þú vilt verða gestur skaltu skilja eftir skilaboð á gergisýkinni.

:: Atli 21:59 [+] :: ::
...

Þetta er sú ímynd sem margir forledrar og annað lítið þenkjandi fólk hefur af Netinu. Það er hlægilegt.

:: Atli 17:58 [+] :: ::
...

Fleiri hafa tilkynnt útkomu prófsins og tel ég það ástæðu til að gleðjast.
\\
Þessi bloggheimur er svo rosalegur að það jaðrar við fáránleika. Ég eyði ómældum tíma á hverjum degi í að lesa hvað annað fólk er búið að vera að gera, meiraðsegja stundum hjá fólki sem ég hefi aldrei hitt. Það er þó alltaf leiðinlegra en fólk sem maður kannast við. Skemmtileg blogg þessa dagana eru t.d. Katrínarbloggið, en hún bregður sér í hlutverk hrokafulls Dr. Love og hjálpar fólki með misheppnað ástarlíf sitt. Gaman að því. Og þar sem ég er í linkastuði mun ég krækja í Ragnheiði, en það hef ég ætlað að gera lengi.
\\
Í gær gerðist nokkuð merkilegt. Ég var í spjalli við Smjörflugu á MSN, og hún spyr mig hvort ég muni eftir Ásgeiri Berg. Ég hvái, þykist ekki hafa heyrt nafnið áður. Hún segir: „Jú, hann segist hafa verið með þér í fyrsta bekk.“ Ég hugsa mig um og man þá vissulega eftir Ásgeiri sem var með mér í fyrsta bekk. Hún segist vera í spjalli við hann, og bætir honum í samtalið. Þannig hittust gamlir félagar eftir rúmlega tíu ára aðskilnað í Netheimum. Ótrúleg þessi tækni. Ég sagði honum að ég hefði stolið af honum leikfangabíl (það eina sem ég hef raunverulega stolið) þegar við vorum minni, og spurði hvort hann vildi fá hann aftur. Hann sagði nei og að ég mætti eiga bílinn og fyrirgaf mér. Loksins. Þetta hefur hrjáð mig sl. 10 ár. Mér finnst sem ég hafi gengið í gegnum hreinsunareldinn.

:: Atli 18:27 [+] :: ::
...

Í dag var dimisjón í MH. Það var nokkuð skemmtilegt, enda aldrei leiðinlegt að fylgjast með drukknum menntskælingum kveðja skólann, nema þegar þeir berja saklausa búðareigendur í leiðinni. Tvö atriði stóðu uppúr: Austin Powers atriði Helga Tómasar Hall, Tobbu, Lísu, Ýr og gæjans sem ég gleymi alltaf hvað heitir. Einnig var Braveheart atriði Daða Ólafs, Sveinbjörns IngibjargarSólraunarsonar, Kung-Fu Kela o.fl. afar skemmtilegt. „Erkifjendur vorir, kennararnir, eru fallnir! Loksins erum við frjáls! Bjarni Ólafs er fallinn! Björn Bergs er fallinn!“ hrópaði sonur forsætisráðherraefnis Samfylkingarinnar. En Gunnlaug Ástgeirsson íslensku/sögukennara gátu þeir ekki fellt og hann stóð eftir sem konungur, vopnaður íslenskuverkefnum. Frekar fyndið.
\\
Ég er ánægður með Odd og Söndru, en hingað til eru þau eina fólkið sem hefur tilkynnt útkomu Which transgressive funker are you? prófsins á vefsíðum sínum.
\\
Kvöldið stefnir í rólegheit.

:: Atli 22:02 [+] :: ::
...

Ég er í hálfgerðri krísu. Var stórvinur minn og gæðablóðið, norski rauðrefurinn Breki að kalla mig kálhaus á síðunni sinni, eða er ég eitthvað að misskilja? Breki, skýrðu mál þitt, fyrr get ég ekki fest svefn; þó ég viti náttúrulega að þetta sé einhver misskilningur. Og annað þessu nátengt; bæði Breki og gaur sem heitir Björn Bragi eru að skrifa texta á bloggum sínum sem ég átta mig ekki á hvort séu kaldhæðnir eður ei, en oft getur verið erfitt að koma sarkastík til skila á fullnægjandi hátt í rituðu máli. Þeir ræða um fátækt og Ameríku og hversu gott það er að sitja heima á Fróni og hafa engar áhyggjur af heimsástandinu, baða sig bara í peningum og hafa það gott. Ég vona að þetta séu kaldhæðin komment.

:: Atli 20:52 [+] :: ::
...

Ég fann þetta á Netinu:

You are...Atli! You'd wish you were in a rock
band, but you just can't play guitar! You hang
around all day and often wish you were
somewhere in the Mediterranean drinking beer.
Music is the love of your life, and you have a
lot of hair on your body! Fantastic!

Which transgressive funker are you?
brought to you by Quizilla

:: Atli 13:12 [+] :: ::
...

Ég er með öllu ósammála gagnrýni Guðjóns á texta Avril Lavigne. Þvert á móti finnst mér Avril vera með umtalsvert betri textapælingar heldur en flest önnur vinsældapopptónlist. Einnig er lagið (ég hef bara heyrt Sk8terboy) ágætt, skemmtilegt tvist á þessa pönk/popp pælingu; miklu betra heldur en öll Blink182 lögin svo dæmi sé tekið. Einnig tel ég að um sé að ræða mistúlkun hjá karlinum, en honum finnst lagið ganga dálítið út á það að Avril sé grunnhyggin; henni finnist fólk betra þegar það er ríkt og frægt. En raunverulega merkir þetta að drengurinn í laginu sé hæfileikaríkur, en stúlkan sá það ekki í gegnum dulu hópþrýstings og lét blekkja sig af klæðnaði hans.
Einnig gerir hann nokkur grunnmistök í umsögn sinni, skilur t.d. ekki opnunarlínurnar:

He was a boy, she was a girl.
Can I make it anymore obvious?
He was a punk, she did ballet.
What more can I say?

Guðjón, Guðjón...hefurðu aldrei heryt um opposites attract, andstæður laðast hvor að annarri, plús og mínus, svart og hvítt, kosmos og kaos, og það er það sem þessar textalínur ganga út á.
Umsögnin er fordómafull, og ég vona að Guðjón vandi sig betur við textarýni í framtíðinni, en mér finnst þetta uppátæki nokkuð sniðugt. Ingi tækjagimp nokkur hefur einnig gert eitthvað af svipuðu á síðu sinni, ef ég man rétt.
\\
Ég er búinn að læra í allan dag. Það hefur aldrei gerst áður, svo ég muni.
\\
Ég hef verið að reyna að finna mér einhverja góða könnun til að setja í staðinn fyrir stjórnmálaflokkafylgið. Mér hefur ekkert gott dottið í hug. Hugmyndir ritist vinsamlega á gergisýkina.

:: Atli 18:44 [+] :: ::
...

Maður er nú frekar montinn þegar góðvinkona manns er stödd á svona mynd, en hún Sóley Valgeirsdóttir er einmitt lengst til hægri - hún ber augsýnilega af.

:: Atli 22:14 [+] :: ::
...

Ég veit ég var búinn að linka á þetta á gamla blogginu mínu, en þetta er bara of fyndin pæling.
\\
Hljómsveitin Nortón spilaði í dag í fermingarveislu hjá börnum Margrétar Guttormsdóttur, kennara í MH. Það var ágætt - við fengum borgað. Ræðum aðeins um Nortón. Nortón er skipuð þeim (í stafrófsröð) Atla Bollasyni, Kára Hólmari Ragnarssyni og Leó Stefánssyni. Hljómsveitin var stofnuð á haustdögum 1999, en hugmyndin kom upp nokkrum mánuðum fyrr. Á fyrstu tónleikum sveitarinnar voru flutt þrjú lög; Fyrsta lagið, Funkytown (cover af vel þekktu popplagi) og lag sem ég held að hafi ekki heitið neitt, en það hófst á undarlegu básúnuspili og liggjandi hljómum og í lokin var það orðið að hardkor teknói á 180 slögum/mínútu. Ekkert þessara laga er í dag á prógrammi Nortón, en sveitin hét Frír bjór í þá daga. Í mars 2000 tók sveitin þátt í Músíktilraunum Tónabæjar og komst í úrslit með lögin Han Solo, Hádegislagið og Séð og heyrt. Ekkert þessara laga er í dag á prógrammi Nortón, þó ég hefði ekkert á móti því að hafa fyrsta og þriðja lagið í einhverri mynd sem hluta af prógramminu. Hádegislagið mun brátt hljóta endurnýjun í hljómsveitinni Atli & Leó. Í framhaldi af Músíktilraunum fór Nortón að semja talsvert af efni, og tók m.a. upp demóið Tilraunafúnk!, undir nafninu Norton. Síðan var grisjað, ný lög samin og nýtt demó leit dagsins ljós, talsvert vandaðra en hið fyrra. Svo var nafninu breytt í Nortón. Öll lög síðasta demós eru virk í flutningi sveitarinnar og ný hafa bæst við. Vonandi mun fyrsta plata Nortón líta ljós á næstu 12 mánuðum. Hún verður fokking góð. Nortón leika transgressívt fönk.

:: Atli 18:42 [+] :: ::
...

Gleðilega páska.
Þetta er búið að vera ágætt. Byrjaði á páskeggi + formúlu. Tók svo páskaegg + einhver-hjólreiðakeppni-í-Hollandi týpuna á þetta. Hlustaði síðan á Dark Side of the Moon, en hún er talsvert betri en mig minnti, bara eitt lélegt lag (Money). Síðan matur hjá Ömmu. Síðan bara rólegheit í faðmi fjölskyldunnar yfir Moulin Rouge.
\\
Í gær sátum ég og Orri á veröndinni hjá Hrafnkeli og drukkum bjór í góða veðrinu. Það er besta tilfinning sem ég hefi kynnst hingað til. Í Útópíu Atla er eilíft sumar og lífið felst helst í því að sötra bjór úti á verönd; einhversstaðar þar sem maður hefur útsýni yfir Miðjarðarhafið. Innan úr stofu berast undurfagrir tónar. En svo tók að dimma og kólna (andstætt við ÚA) og þá héldum við inn, drukkum eilítið meir, hittum eilítið fleiri, spjölluðum elítið meir, og ég skemmti mér konunglega. Síðan var haldið heim til Högna og slappað aðeins af, kassagítarstemmning (samt ekki svona hallærisleg einsog í Verzló-partíum, heldur svona kúl einsog í MH-partíum) og viskí drukkið. Síðan niðrí bæ þar sem manni var hent útaf Dillon fyrir að vera bara með skilríki upp á 1985. Af Laugaveginum og heim í skottinu á hvítri Toyotu.
\\
Leó er fyndinn gaur. Hann stakk upp á því að við myndum búa til listaverk til að hafa í herberginu hans, og ég stakk upp á því að búa til hljóðlistaverk sem væri alltaf í gangi inni hjá honum. Honum hefur greinilega litist svo vel á þetta að hann útfærði hugmyndina fyrir mig og útlistaði á MSN:

Leó says:
það gæti verið þannig að þú værir alltaf inni í herberginu mínu að spila á orgelið. það myndi bara heita "organisti" eða e-ð. svo myndi ég bara lifa mínu lífi, fara að sofa, fá mér að ríða o.s.frv. og alltaf værir þú að spila á orgelið í herberginu mínu

Snilld.
\\
Niðurstöður könnunarinnar hér til vinstri eru ansi skemmtilegar. Átti í raun ekki von á svona afgerandi vinstri-sinnun. En mest gleður mig þó að sjá að aðeins ein vesæl sál hafi valið framsókn. Sá flokkur hlýtur einfaldlega að vera það fáránlegasta sem til er í stjórnmálasögu alheimsins. Að undanskildum Guðna Ágústssyni, ég vildi að hann gengi í Samfylkinguna eða eitthvað.

:: Atli 23:35 [+] :: ::
...

Ég sé ástæðu til að bæta við tengli á Björgu í Brussel, en það gleymdist. Frekar skemmtilegt blogg sem segir frá ævintýrum hennar í heimaborg ýmissa stofnanna.
\\
Er nú staddur heima hjá meistaranum Hrafnkatli rauða, en hér hyggst ég neyta bjórs og halda svo til annars meistara; Högna Egilssonar. Þar er einhverskonar partí, tel að meirihluta viðstaddra verði karlar. Á morgun eru svo páskar og þá vonast ég til að borða páskaegg. Þetta er allt saman voðalega innihaldslaust + að ég e´r í svona semi-tímapressu, svo það kemur miera seinna.

:: Atli 21:19 [+] :: ::
...

Innileg afsökunarbeiðni til lesenda sökum bloggleysis. Mér var bara neitaður aðgangur að Netinu í gær, tengingin neitaði að virka. En þetta er komið í lag, hallelúja.
\\
Ég held ég hafi verið full rausnarlegur á Yeah Yeah Yeahs, hef ákveðið að droppa niður í 8/10.
\\
Á miðvikudaginn fór ég að sjá kvikmyndina Bowling for Columbine. Snilldarverk. Michael Moore er nýtt átrúnaðargoð mitt. Myndin fjallar á svo skemmtilegan, en áhrifaríkan hátt um byssueign, á furðu hlutlægan hátt. Svona kvikmynd á að nægja til að þagga niður í Frjálshyggjufíflum. Charlton Heston kemur út sem algjör skíthæll, sem mér finnst samt frekar leiðinlegt því hann er über-svalur í Planet of the Apes. Þeir sem ekki hafa séð Bowling..., hafa ekkert séð. 9,5/10 Undarlegt þykir mér samt að myndin hafi fengið Óskarsverðlaun, því samfélagsgagnrýnin í myndinni er svo sterk, og Akademían er nú ekki þekkt fyrir krassandi pælingar. Skrítið að hún fái verðlaun þrátt fyrir fremur augljósan Anti-Bush áróður.
\\
Í framhaldi af bíói fór ég og hitti meistarana þrjá: Kára, Leó og Orra úti við Fossvogsskóla, þar sem þeir léku sér á hjólabretti og hlaupahjólum. Eftir nokkurn tíma þar, vorum við allir sammála um að nú væri gúddsjitt að fá sér bjór. Ég átti eina 8, Svala var að geyma 5 stk. heima hjá mér, Orri átti einn og Kári tvo. Við drukkum allt þetta og gott betur. Einkar skemmtilegt djamm þar sem við spjölluðum um allt milli himins og jarðar og toppuðum svo sjálfa okkur þegar við brutumst inn til Hrafnkels rauða, sem svaf ásamt kærustunni Kristínu í hjónarúminu. Við læddumst um húsið, földum alla skó sem við sáum og drukkum bjór. Þau skitu á sig úr hræðslu yfir því að einhverjir ribbaldar væru komnir í húsið. Haha. Þeim fannst þetta ekki jafnfyndið og okkur. Hrafnkell sagði meiraðsegja við Kára og Leó: „Djöfull hata ég ykkur, strákar...“.
\\
Í gærdag var ég úti í sólinni niðri við skóla, og við héldum áfram að læra að skeita. Gengur frekar illa, þar sem við viljum eiginlega ekki meiða okkur, og höfum aldrei komið nálægt hjólabretti áður. (Að undanskildum Leó, sem er fyrrverandi skeitari). Ég er samt nokkuð efnilegur ollari. Svo kíkti ég á tónlistarmarkaðinn í Perlunni. Ég tel að ég sé með einhverskonar kaupæði þegar kemur að tónlist, ég ræð einfaldlega ekki við mig. Ég á nánast engan pening en það stöðvar mig ekki í því að kaupa allavega eina plötu á viku. Ég held í alvörunni að ég hafi eignast svona 40 plötur frá upphafi árs. Ég keypti semsagt London Calling með The Clash og In the Court of the Crimson King...An Observation by King Crimson. Sú plata er stórkostleg. Progg í hæsta gæðaflokki, enda enginn annar að syngja en Greg Lake úr Emerson, Lake & Palmer. Rýni seinna.
Í gærkvöldi ætlaði ég svo á 28 Days Later en það var uppselt. Beilaði þá bara heim til Svölu og slappaði af. Í dag fór ég svo í sund í sólinni og kíkti svo í þrítugsafmæliskaffi til frænku minnar.

:: Atli 18:11 [+] :: ::
...

Er nýkominn heim úr sumarbústað. Það var ágæt för, eilítið undarleg þó. Með í för voru ég sjálfur, Svala, Bryndís, Helgi kærastinn hennar, Signý, og svo fjórir Hafnfirðingar: Kolli, Ingó, Simmi og einhver ljóshærð og heimsk gella. Ég sá þrjá síðastnefndu í fyrsta (og ábyggilega seinasta) skipti. Þetta var ágætt, við sátum bara að sumbli og spjölluðum og síðan færðist drykkjan í aukana og tekíla var komið í spilið. Þá var ekki langt í það að ég gæti varla talað sökum ölvunar. Þegar ég hafði setið í einhverjum heitum potti í klukkutíma með 30 m/s af ísköldum vindi beint í andlitið var ég næstum því dauður úr kulda, og ekki bætti úr að allt heitt vatn var búið í sturtunum; þá kom Svala og sótti mig og fór með mig inn, klæddi mig úr, hjálpaði mér að taka úr mér linsurnar og háttaði mig bókstaflega. Þar sofnaði ég (sennilega um kl. 2) og svaf til morguns. Hljómar óspennandi en þetta var alveg frekar gaman.
\\
Bloggin mín eru tímasett klukkustund síðar en raunverulegt er. Hlýtur að hafa tengsl við sumartíma.
\\
Yeah Yeah Yeahs
Það hefur valdið mér nokkru hugarangri hvort ég eigi að dæma plötuna einungis út frá því sem ég heyri frá því að platan hefst þangað til henni lýkur, óháð lengd og verði. Platan er 5 lög, innan við 14 mínútur, og kostaði mig 900,- krónur. Ég græt nú ekkert þessa peninga, og styttin fer ekkert sérstaklega í taugarnar á mér; en væri réttlætanlegt að gefa plötu sem væri eitt 2 mín. lag og kostaði 5000,- 10/10? Allavega, YYY hefst á hinu frábæra lagi Bang, sem er ferskasti slagari sem ég hef heyrt lengi, ein skemmtilegustu gítarriff sem ég man eftir. Söngkonan Karen O syngur af miklum sannfæringarkrafti, m.a. hina stórskemmtilegu línu: „You ain't no baby no more, baby“. Þreföld neitun. Í kjölfarið fylgir Mystery Girl sem nær aldrei sömu hæðum og Bang, hljómar meira gamaldags, svona dáldið pönkað, en ekki jafn grípandi. Þá er komið að Art Star sem flakkar milli mjög harðra rokk-öskra, alvöru hardkor dót, og nett fönkuðum dúdúdúdú kafla. Textinn er einnig skemmtilegur, fjallar um artí fartí fólk: „Shit, I've got a gallery in New York!“. Skemmtilegt lag, eilítið þungt þó. Miles Away er öllu léttara, pönkað og dáldið gamaldags, en nægur kraftur til staðar. Gaman er að heyra í Karen anda þungt yfir mestallt lagið. Betra en Mystery Girl, en ekki jafn gott og hin tvö. Lokalagið er það rólegasta, Our Time, og lítið um það að segja annað en það er gott. Gítarinn rennir sér á milli hljóma. Hljómar dáldið einsog mig minnir að Heroin með Velvet Underground hljómi. Bara rokkaðra. Yeah Yeah Yeahs fá 9/10 frá Atla, og hann bíður spenntur eftir plötunni frá þeim sem kemur út 24. apríl. (Mér tókst að hlusta á alla plötuna meðan ég skrifaði dóminn)

:: Atli 15:40 [+] :: ::
...

Ingvar Örn Ákson er beðinn afsökunar á því að ég hafi ekki nennt að fletta nafninu hans upp í heild sinni.
\\
Ég fer í sumarbústað eftir örfáar mínútur í félagsskap Svölu, kærustunnar minnar, og félögum hennar úr heimabænum Hafnarfirði. Ég þekki fæsta, en þó verða þarna meistarar á stangli. Þetta er pjúra fylleríisferð, við snúum aftur til Reykjavíkur á morgun. Svona á að hafa það í fríinu.
\\
Ég fór í jarðarför og erfidrykkju í dag. Það var bara ágætt, alls ekkert svo sorglegt (allavega í samanburði við kistulagninguna), þó svo að hún hafi ábyggilega verið það fyrir þá sem hvorki komu á sjúkrahúsið eða í kistulagningu. Svo var svo falleg mynd af henni Frænku framan á prógramminu, að maður gat varla annað en brosað. Ég fór líka með í kirkjugarðinn í fyrsta skipti, það var dálítið skrítið. En nú er þessu lokið, líkaminn kvaddur - en minningin lifir.
\\
Í gærkvöldi sá ég Gamle mænd i nye biler. Hún var svo einkennileg, að maður vissi aldrei hvort maður átti að hlæja eða gráta eða hvað. Hún var líka meingölluð, handritslega séð. Hún fær ekki nema 3/10 hjá Atla. Einnig sá ég kvikmyndina Welcome to the Dollhouse, öllu betri kvikmynd. Todd Solondz, sem skrifaði og leikstýrði Happiness (sem ég var mjög hrifinn af), er allt í öllu á bakvið þessa mynd um erfiði uppvaxtaráranna, með sérstaka áherslu á einelti og erfiðar fjöslkylduaðstæður. Um þetta er þó fjallað á mjög kómískan hátt. Kolsvartan kómískan hátt. Welcome... fær 7/10 í einkunn hjá Atla.

:: Atli 20:05 [+] :: ::
...

Leiðinlegustu ritdeilur í heimi eru í gangi milli Breka Logasonar, Ingvars Áka Eitthvaðssonar, Baldurs Kristjánssonar og Braga Málefnalega. Þeir þrír fyrrnefndu eru í Verzló en sá síðastnefndi í FB. Deilurnar snúast í sem stystu máli um það hvort að ferill Breka sem ræðumanns sé ofmetinn, og hvort að Bragi sé bitur. Ég er ósammála báðum fullyrðingum. Eini maðurinn sem ofmetur Breka er Ingvar, Breki er alveg rólegur en oftúlkar augsýnilega orð Braga. Baldur er líka með svona frekar skynsamlegt approach, eini maðurinn sem virðist skilja að Bragi var ekki að reyna að varpa einhverri sprengju. Bragi tekur skemmtilega á þessu öllu saman, svarar í hálfgerðu gríni og virðist skilja fáránleika deilnanna. Ég er að miklu leyti sammála Braga, mér fannst úrlistin slakasta keppni Breka hingað til, og stíllinn sem hann er búinn að taka upp fer ekki vel í mig. En Breki er mjög góður, ég fer ekki af því, og ég hef séð hann gera flotta hluti. Varðandi það hvort Bragi sé bitur, þá held ég ekki; hann er bara að reyna að tjá sig í friði. Svo að sá sem tapar þessu öllu saman er Ingvar (eða Byssan), fyrir það að segja að Hafsteinn Þór Hauksson og Björn Berg séu bestir á landinu, og fyrir að vera svo ótrúlega mikill ræðu-lúði að annað eins hefur ekki sést, ekki einusinni hjá Guðjóni H. Valgarðssyni. Strákar, Morfís er skítakeppni, og við vitum það allir. Morfís er ofmetin.
\\
Systir mín fermdist í gær. Hún fékk heví góða stafræna myndavél sem ég mun án efa leika mér með. Húsið var fullt af gömlu fólki, sem ég þekki ekki vel; og ég reyndi bara að halda mig við borðstofuborðið og skella í mig skinkuhornum og kexi + ostum og kókoskökum o.s.frv. Hún fékk líka fullt af peningum, u.þ.b. 150.000 kjell. Til hamingju Brynhildur. Staddur var í veizlunni Jim nokkur, en hann er eiginmaður Biddu frænku minnar sem hefur verið búsett í Bandaríkjunum frá 1965. Hann var lengst af flugmaður hjá United Airlines sem nú er farið á hausinn. Hann var að segja okkur frá því þegar hann var í The U.S. Air Force. Það voru ekkert smá svakalegar sögur. Hann starfaði semsagt við það að fljúga með kjarnorkusprengjur, takið eftir, hann starfaði BARA við að fljúga með kjarnorkusprengjur í kalda stríðinu. Oftar en einusinni var hann í alvörunni lagður af stað til Sovétríkjanna, en sem betur fer var honum alltaf snúið við. Hann flaug frá Nevada, og þaðan og til Moskvu eru 17 klukkustundir. Það var sagt við hann: „Heyrðu, þú átt að varpa þessari atómsprengju á Moskvu, þú ert með eldsneyti til 18 klukkustunda. Reyndu bara að stinga rykskýið af og lenda einhversstaðar í Finnlandi. Hérna eru þúsund dollarar, gangi þér vel.“ Fokk. Hann sagði að það hefði stundum verið svo stutt í kjarnorkustyrjöld, að maður tryði því varla. Sérstaklega þegar Kúbudeilan stóð yfir. Svo hafði hann verið aðeins í Víetnam, og verið á varðbergi eftir að Kennedy var skotinn. Djöfull fannst mér þetta allt ótrúlegt. Svona histórísk figúra.
\\
Í gærkvöldi hittumst við saman tólf stykki heima hjá Tvíburunum og spiluðum félagsvist. Það var frekar fyndið, hef ekki spilað svoleiðis síðan á einhverju foreldrakvöldi í Réttó. En góð stemmning engu að síður.
Í kvöld hugsa ég að ég fari í bíó, annaðhvort á Bowling for Columbine, eða á Gamle mænd i nye biler. Svo langar mig í bjór, vonandi að maður geti mixað það.
\\
Djöfull er ljúft að vera í fríi, í dag kíktu krakkarnir á mig, nývaknaðan kl. 13:00, og við átum afganga úr veizlunni í gær. Svo kíktum ég og Svala bara niður í bæ í rólegheitunum og leituðum að afmælisgjöf handa Bryndísi. Ég rölti mér m.a. inní 12 tóna og keypti mér Yeah Yeah Yeahs EP á 900 kjell, og sándar hún alveg fáránlega vel. Rýni seinna.

:: Atli 19:03 [+] :: ::
...

Gærkvöldið var...fínt. Skemmtilegt fyllerí sem hófst heima hjá Ásgeiri með vodka + vatni, gin + tonik og að ógelymdum hvítum rússa. Eftir nokkurt sumbl og spjall (viðstaddir voru ég, Orri, Ásgeir, Anna Hrund, Kristín, Hrafnkell, Anna Rúna og einhver Gunnhildur) og dans og Salt'n'Peppa; var haldið í afmæli Ólafar Auðar Erlingsdóttur sem varð 18 ára. Hún býr í Hlíðunum. Þar var svona semi-góð stemmning, frekar margir mættir og flestir vel í því. Þarna voru einnig staddir tveir Finnar sem maður er ekki vanur að hitta í partíum. Ég á ekki við menn frá Finnlandi, heldur Finn Ragnarsson og Finn Guðmundsson. Þann fyrrnefnda hittir maður ekki oft, en hann er bróðir Kára í Nortón. Ekki veit ég hvað hann var að vilja í 18 ára afmæli stúlku sem hann þekkir ekki neitt (hann er 22 ára), en á tímabili virtist hann vera að hözzzzzzla Sóleyju Jónsdóttur. Finn Guðmundsson hittir maður sjaldan því hann er ekki djammari, hann drekkur ekki og lætur almennt frekar sjaldan sjá sig. Hann var þó ferskur, og dansaði piaprkvörnina og bréfberann og kenndi okkur tvo nýja, þó ég muni aðeins annan: Brauðristina. Þegar þetta partí var farið að þynnast allsvakalega ætluðum við að halda heim á leið. Ég, Leó, Ásgeir og Orri settumst inní bíl Önnu Rúnu. Leó hljóp inn að sækja Finn Kárabróður til að draga hann með. Hann var ekki alveg á því og þeir glímdu nokkuð fyrir utan opna bílhurðina sem endaði með því að höndin á Leó fór í gegnum glerið sem brotnaði í þúsund mola. Það var nokkuð fyndið, en samt ekki, því þetta kostar vissulega peninga. Leó skarst líka allur, ekkert alvarlega þó. Þessu fylgdi nokkuð kaotískt ástand, Ólöf að stressa sig yfir glerbrotunum, Ásgeir að æla yfir allt saman, Leó að vefja höndina á sér inn í grisju, Finnur að bölva okkur og svona mætti áfram telja. Þetta var nokkuð gaman.
(Ég vil biðja þá lesendur sem ekki þekkja þetta fólk afsökunar)
\\
Í dag tók ég svo til í herberginu mínu og hlustaði á hinn stórgóða disk Kanada með hljómsveitnni Kanada. Þar er m.a. að finna lagið Tommy Lee og mér var sagt einhverntímann að Tommy Lee sjálfur hafi komist yfir þennan disk, hlustað á lagið og tárast yfir því að einhver skyldi nefna lagið sitt eftir honum. Maður veit ekki hversu satt þetta er.
Svo fór ég í sund og svo í bíó. Kvikmyndin Spider í leikstjórn David Cronenberg varð fyrir valinu. Hún var ágæt, fjallaði um geðklofa sem er að rifja upp æsku sína. Þar sést greinilega hversu firrða sýn hann hefur á veruleikann, en Ralph Fiennes skilaði þessu hlutverki ágætlega. Skemmtilegt fannst mér að myndin gerist í Englandi, en myndin er kanadísk. Ég átti von á öðruvísi mynd frá David Cronenberg, en hann er jú þekktur fyrir eilítið gory myndir. Spider fær 7/10 frá mér.
\\
Systir mín fermist á morgun, svo ég verð slakur á rólegri kantinum í kvöld. Sé kannski loksins kvikmyndina A.I. sem ég hef alltaf misst af. Hef þó heyrt því fleygt að hún sé léleg, en ekki frá neinum áreiðanlegum. Reyndar er sá eini sem ég treysti til að hafa svipaðan smekk og ég á listum Leó Stefánsson. Stundum Orri og stundum Svala. En enginn annar. Þetta er meira og minna smekklaust lið sem ég þekki. Neinei, en ég er ósammála öllum öðrum. Alltaf. Neinei, en þetta eru bara aumkunarverðir skíthælar. Neinei...jæja nú er ég hættur. Ég þekki bara meistara. Ég hitti Gunnar Jónsson í bíó. Hann var ferskur. Ég ætla að hringja í hann í páskafríinu og spyrja hvort hann nenni ekki að koma á fyllerí. (Þegar maður var minni sagði maður „viltu vera memm?“, nú er þetta örlítið harðara.)

:: Atli 21:43 [+] :: ::
...

Saturday night, Girls and Boys, Lemon Tree, Your Woman, Macarena, Gangsta's Paradise, All that she wants, What's up?, Get Ready For This, Move Your Ass, No Good, Big Dick Man/Short Dick Man, Tubthumping, Wannabe, dub-i-dub.
Þetta eru lögin sem sveitin Ass of Bass lék í gærkvöldi á mjög vel heppnuðu 90's balli. Góð stemmning, góður salur, gott fólk, góð tónlist (?) og gott stuð. Gott. Það má sjá myndir af uppákomunni hér og hér.

:: Atli 18:51 [+] :: ::
...

Switzerland -
A neutral power for as long as most can remember,
it has avoided war for several centuries.
However, it is still considered highly advanced
and a global power.

Positives:

Judicial. / Neutrality. / World-Renouned. / Powerful without Force. / Makes Excellent Watches, Etc.

Negatives:

Target of Ridicule. / Constant Struggle to Avoid Conflict. / Target of Criminal Bank Accounts.

Which Country of the World are You?
brought to you by Quizilla

Ég og Oddur eigum það sameiginlegt að vera Sviss. Það má deila um hversu gott það er - þeir eru allavega friðsælir

:: Atli 18:20 [+] :: ::
...

Ótrúlegt
Eitt ár skilur þessar ljósmyndir að, en ekkert hefur breyst, ef frátalið er hárið sem hefur öðlast allsvalari ásýnd í nýja tímanum. Ef Orri klippir sig verð ég brjálaður. Einnig er gaman að sjá að á fyrri myndinni er bakgrunnurinn gulur en Orri íklæddur hvítu, en þetta snýst akkúrat við á síðari myndinni. Mikið er Orri alltaf glaður.
\\
Ég og liðið mitt töpuðum í gær í MORTAR. Það skýrist af því að tíu mínútum fyrir keppnina tók einhver ræstitæknirinn uppí MH sig til og henti báðum ræðunum mínum. Ég fann þær ekki á tölvutæki formi, og eftir umtalsverða leit í ruslagámnum fundust þær ekki og ég tók þetta bara freestyle týpuna á þetta. Það gekk ekki alveg. Munurinn var eitthvað um 40 stig. Umræðuefnið var allt og mældum við með. Þetta er án efa ruglingslegasta keppni sem ég hef keppt. Okkar útgangspunktur var svona nokkurnveginn að þar sem þau mældu á móti öllu, hlytu þau að vera fylgjandi engu, og þar sem ekkert er eitthvað (t.d. orð) þá eru þau fylgjandi einhverju, og þ.a.l. í mótsögn við sjálf sig. Ef þið skiljið þetta ekki almennilega legg ég til að þið skiljið eftir skilaboð á gergisýkinni (sjá hér að ofan). Annars finnst mér þið ekki hafa verið nógu virk þar, ég átti vona á því að þetta yrði stærsti spjallvefur landsins. Einsog Kaninn segir: Suit your slef.
\\
Hljómsveitin Ass of Bass sem er skipuð af mér, Kára og Leó; æfði til klukkan 4:15 síðastliðna nótt. Þess vegna sá ég mér ekki fært að mæta í ensku og eðlisfræði í morgun. Ef einhver saknaði mín er hann hér með beðinn afsökunar. En Ass of Bass er stórkostleg hljómsveit. Við erum búnir að setja saman meira en hálftíma af feitum dans/popprokk-lögum frá tíunda áratug seinustu aldar í eitt stórt megamix. Það tryggir stanslaust stuð og mikla gleði. Megamixið verður svo flutt á 90's balli NFMH annað kvöld og hvet ég alla til að mæta, nema þó ekki til að heyra þessa geðsýki. Ég skal birta lagalistann í heild sinni að ballinu loknu, vil ekki spoil the party, einsog Kaninn segir. Ásamt okkur munu leika koverrokksveitin The Musicians, en hún sér um rokkaðri hluta áratugarins; og DJ-AMMA, en sá plötusnúður hefur sótt mikið í sig veðrið eftir góðar undirtektir í partíum og er á hraðbyr upp á stjörnuhimin snúðaheims.

:: Atli 16:10 [+] :: ::
...

Ég er búinn að taka niður drykkju-könnunina mína, og setja nýja upp í staðinn. Niðurstöðurnar úr drekkur þú, lesandi? komu ekkert sérstaklega á óvart. 25% drekka hverja helgi, 32% tvisvar til þrisvar í mánuði, og 14% mánaðarlega. Samtals gera það 71% sem drekka allavega einusinni í mánuði. Til hamingju! 10% drekka ekki; en það hlutfall mætti lækka. Alls kusu 88. Nýja könnunin er af alvarlegri toga, tekur til stjórnmálalegra skoðanna ykkar, lesendur góðir. Þetta er frekari viðleitni til að kynnast manninum á bakvið tölvuskjáinn.
\\
Ég er að hugsa um að vera með einhverskonar listrýni, kíki kannski inn í plötuskáp og dreg eitthvað fínt og flott fram til að segja ykkur frá.
Aha; platan No P or D með þýska dúóinu Ms. John Soda. Þessi plata kom út seint á síðasta ári, hjá hinu ágæta fyrirtæki Morr Music sem hefur m.a. gefið út „plötuna“ Please smile my noise bleed með múm. Ms. John Soda eru þó að sýsla við öllu poppaðri tóna. Lögin samanstanda af undurfögrum söng söngkonunnar (sem ég nenni ekki að fletta upp nafninu á) og forrituðum trommutöktum, ásamt gítar og einhverju sem hljómar dáldið Rhodes-lega. Lögin eru að popplengd, um 4 mín. Áferð disksins er flott, þrátt fyrir að hún sé að miklu leyti ættuð úr stafrænu umhverfi helst ákveðinn hráleiki sem birtist í slagverki og gítar. Platan endaði á árslistum ýmissa vefrita, t.d. Brainwashed og Pitchforkmedia. Lögin eru 8 og hvert öðru betra. Þó vil ég sérstaklega nefna Solid Ground, sem er eina ballaða disksins og Unsleep sem er frábær tölvurokkslagari. Þetta er tónlist sem höfðar jafnt til raffífla og rokkskíthæla, brúar bilið, svo að segja. Meiraðsegja poppfávitar ættu að geta fílað hana vel, ef þeir halda huganum opnum í rúman hálftíma. 8.5/10
\\
Sindri nokkur Sverisson, bróðir Önnu Gettu Pálu Beturdóttur, bloggar á doktor.blogspot.com. Sindri er frábær gaur og höfum við verið saman í geysimörgum tímum. Hann fær rokkprik fyrir að hafa bitið punginn undan menntamálaráðuneytinu þegar hann dreif sig í samræmd próf í níunda bekk, því hann „nennti ekki að vera lengur í skólanum“. Ég skil hann vel, djöfull er örugglega ömurlegt að búa úti á landi. Bloggið hans fær einnig prik fyrir að vera ritað á skemmtilega gelgjulegan hátt, bæði í umfjöllunarefni og stíl.

:: Atli 15:20 [+] :: ::
...

I am p Everyone loves pi _

what number are you?

this quiz by orsa

:: Atli 16:16 [+] :: ::
...

Ég er nýkominn heim úr fermingarveislu. Það var ekkert mjög skemmtilegt, bara svona einsog fermingarveislur eru.
\\
Ég gleymdi að tilkynna lesendum keipdúnksins að Fellaskóli sigraði Breiðholtsskóla í ræðukeppni Breiðholtsins hér um daginn. Til hamingju stelpur!
\\
saevarom@hotmail.com hefur bætt mér á kontakt-listann sinn á MSN. Ég veit ekki hver þetta er, ekki að svo stöddu allavega.

:: Atli 15:52 [+] :: ::
...

Hér má að öllum líkindum sjá seinustu ljósmynd sem var tekin af mér sem Ræðumaður lýðveldisins.

:: Atli 19:15 [+] :: ::
...

Ég punktaði einusinni hjá mér dálítið sem hún Frænka sagði, og mér fannst sérstaklega eftirminnilegt. Þetta var þegar hún var hérna heima og ég var að spila Loksins erum við engin með múm og lokalagið, Sveitin milli sólkerfa var í gangi. Mamma spurði hvort ég vildi nú ekki lækka í þessu (eða eitthvað svoleiðis) og ég sagði henni að það væri bara dálítið hollt fyrir hana að hlusta á þetta stórkostlega lag. Frænka greip þá inn í og sagði: „Þetta er ekki lag, en ég kann vel við þessi hljóð.“

:: Atli 14:10 [+] :: ::
...

Templatið fokkaðist eitthvað upp, en mér tókst að laga það, en blái liturinn á bakvið gamalt tenglana er kominn aftur.

:: Atli 12:09 [+] :: ::
...

Ömmusystir mín, Þóra Böðvarsdóttir, sem ég hef þó alla ævi kallað Frænku lést í morgun. Pabbi hringdi í mig þar sem ég lá sofandi í rúminu hennar Svölu og sagði mér fréttirnar. Ég skaust heim og fór ásamt fjölskyldu minni og frændfólki upp á Landsspítala, að sjá hana áður en hún yrði flutt í líkhúsið. Það var frekar erfitt. En ég hef sjálfur sagt að það sé ekki svo sorglegt þegar fólk yfir áttræðu deyji, og ég stend við það. Ég tel að hennar tími hafi verið kominn, og hún sé sjálf sátt við sinn eigin dauðdaga. Guð blessi þig, Frænka.
\\
En að léttara meti; spá mín um úrslit kosninga NFMH reyndist rétt að undanskildu einu embætti: Atli Viðar bar sigur úr býtum í Meðstjórnandann en ekki Ragnheiður Sylvía, einsog ég hafði spáð.
\\
Morfís-úrslit voru háð í gær. Þetta var versta úrslitakeppni sem ég hef séð, og stóðu bæði lið sig fremur illa. Kannski ég bombi einu ísköldu mati á þetta:
Frummi MRinga, Árni, stóð sig með prýði í fyrri umferð; hann hefur skemmtilegan talanda og ég var að kaupa ræðuna hans.
Frummi VÍ, Björn Bragi, var einnig nokkuð góður, þuldi upp þau störf sem karlmenn hafa gegnt og gegna, og dásamaði þau. Hann virkaði ágætlega á mig, og ég úrskurðaði þá jafna.
Einar, meðmælandi MRinga, var of reiður á of ósannfærandi hátt. Einnig var hann með einn stysta svarakafla sem ég man eftir í Morfís. Frekar tæpur.
Jónas Oddur (gamall félagi minn úr bjöllukórnum) var memmi VÍ og stóð hann sig svona lala, svo ég úrskurðaði memmana einnig jafna.
Svo var komið að Jóa, stumma MR. Hann kunni ræðuna sína mjög illa, en hún var skemmtileg og bara nokkuð góð. Átti samt von á meiru.
Þá var komið að Breka, stumma VÍ. Breki er góður ræðumaður, en með fullri virðingu stóð hann sig ömurlega þarna og ég fullyrði að ég hafi aldrei séð hann svona lélegan. Leiðinlegt að enda ferilinn svona. Hann hélt áfram með hinn undarlega vera-geðveikt-reiður-í-öðruhverju-orði stíl, og ræðan var léleg. Hann klúðraði líka ávarpinu sínu. Ég varð fyrir vonbrigðum með Refinn.
Í hléi sagði ég að MR væru 3-2 yfir.
Svo fór í hönd seinni umferð, sem er án efa langlanglangleiðinlegasta umferð sem ég hef nokkurntímann séð í ræðukeppni. Svarakaflarnir voru allir eins, og öll svörin eins. Bæði lið voru léleg. Ég var næstum því dauður úr leiðindum. Frummi VÍ tók frumma MR, meðmælendurnir voru svona ca. jafnir, Jónas hefði haft vinninginn ef hann hefði ekki fokkað endanum sínum alveg gjörsamlega upp. Svo voru það stuðningsmennirnir: Jói kunni ekki einn staf í sinni ræðu, en skilaðu engu að síður ágætu verki; en Breki hélt áfram að vera svona frekar slakur, þó betri en í fyrri umferð. Að keppninni lokinni spáði ég VÍ 20-30 stiga sigri. Björn Bragi fannst mér bestur í Verzló-liðinu, en Jói í MR-liðinu. Spáin rættist, Verzló sigruðu réttilega með 26 stigum; Jóhann Alfreð Magnússon hafði af mér Ræðumaður Íslands titilinn, og er hann vel kominn hjá honum. Til hamingju Jói, til hamingju Verzló.

:: Atli 11:58 [+] :: ::
...

Þetta Morfís-ráð samanstendur af neföpum. Mér var boðið að setja keppnina (eftir að Gunnari Jónssyni hafði víst verið boðið það, en hann afþakkað) og þáði það. En ég verð að koma aleinn, því þau geta víst ekki plöggað miða handa Orra félaga mínum (og besta frummælanda í heimi) sem vill endilega koma. Kannski er það bara hroki og viðbjóður en mér finnst fátt sjálfsagðara en að núverandi Morfís meistarar fái boðsmiða á úrslitin. Það datt Morfís-ráði ekki í hug. Eitt gat þó Konni sagt mér jákvætt, þau ætla víst að kíkja á þessa flugmiða að úrslitunum loknum. Ef það gengur ekki upp hjá þeim, þá er öll mín trú á Morfís gufuð upp.

:: Atli 18:43 [+] :: ::
...

Ég ætla að gerast kræfur og spá fyrir um úrslit vorkosninga NFMH, algjörlega óháð því þó hvað ég muni sjálfur kjósa:

Forseti: Alma Joensen
Ritari: Helga Huld
Gjaldkeri: Yngvi
Meðstjórnandi: Ragnheiður Sylvía
Framkvæmdastjóri: Sigurður Kári
Skóstjórnarfulltrúi (haha): Ólöf Auður
•••
Listafélag: Glassúr
Skemmtiráð: (Mjööööög erfitt; en...) Húlla
Málfundafélag: Leníngrad

Öll hin félögin eru ein í framboði og ég held að ekkert þeirra falli á auðum seðlum
\\
Það eru farnar í gang pólitískar umræður á nfmh.is. Fyrir þá sem vilja sjá eru þær hér. En þeir sem eru ekki í MH geta ekki lesið þetta, því maður þarf að vera loggaður. Eeeen, Alex Plöggari ætlar að bjarga því (þó þetta sé fokking bannað): Loggið ykkur inn á kennitölunni 1012862079 með lykilorðinu analkarl, og þá getið þið tékkað á þessu.
\\
Og meira af nfmh.is; hér (1/2/3/4)má sjá myndir af mér, sérstaklega gott fyrir þá sem vita ekki hver ég er. Ég mæli með því að þið skoðið samt ekki bara myndirnar af mér, heldur allar fínu myndirnar (sem þó mættu vera fleiri). Hin alræmda motta er enn við lýði á þessum myndum.
\\
Á þriðjudag fer fram undanúrslitaviðureign liðsins sem var áður þekkt sem Hell is for heroes í MORTAR. Umræðuefnið er allt og erum við fylgjandi.

:: Atli 19:40 [+] :: ::
...

Nefapinn og vitleysingurinn Elliði hefur hafið bloggun á www.rectiontray.tk, og er það vel.
\\
Helvítis Blogger er búinn að vera að fokka í mér, svo það sem ég ritaði 1. apríl birtist ekki fyrr en núna.
\\
Annars er lítið að frétta. Ég hef sjaldan verið jafn þreyttur og sl. þriðjudag og miðvikudag. Ég var svo þreyttur að ég fékk mér kaffi, en því er ég nú aldeilis óvanur. Ástæðurnar eru langir dagar. Að skóla loknum hef ég brunað upp í Fellaskóla, og komið svo heim til mín um kl. 22:30. Þá hefur beðið mín t.d. lestur bókarinnar High Fidelity fyrir ENS483. En annars er ég þokkalega slakur á vinstri kantinum. Kosningavikan hefur verið semi-góð, betri en hún leit út fyrir á mánudegi. Mesta spennan er að mínu mati í skemmtiráðskosningum, en þar bítast tvö stelpnaframboð um yfirráð yfir böllum og bjórkvöldum. Þetta verður gaman að sjá.
\\
Önnin er nú á enda, og þá verður maður að bæta upp fyrir það sem maður er búinn að fokka upp, t.d. efnafræðiskýrslur. Vona að þetta reddist allt saman.
\\
Morfís-ráð er alltaf í sama ruglinu. Núna ætlar það bara að selja miða í MR og Verzló. Enginn virðist hafa heyrt um að Ræðumenn Íslands og vinningslið séu á gestalistum, og þau grunaði ekki að einhver annar en fundarstjóri setji keppnina. Sömuleiðis efast ég um að sjónvarpsútsending fari fram, þó ég voni það að sjálfsögðu. Þau gleyma örugglega að setja nafnið mitt á bikarinn. Og hvar er utanlandsferðin? Fucking amateurs.

:: Atli 18:23 [+] :: ::
...

Næstkomandi föstudag verður úrslitaviðureign Morfís háð í Austurbæjarbíói. Þar munu mætast lið Menntaskólans í Reykjavík og lið Verzlunarskóla Íslands. Umræðuefnið er Eru karlmenn að standa sig illa? Ég veit ekki hvað ég á að halda um þetta efni, satt best að segja finnst mér það eiginlega lélegt. Standa sig illa í hverju? Og þetta efni er svo ótrúlega keimlíkt efnunum Heimur versnandi fer og Mannkynið, sem hefur verið keppt um nýlega. Ótrúlegast þykir mér að MR hafi treyst sér í keppni á móti Verzló þegar það eru einungis tvær vikur síðan þeir kepptu um mannkynið í heild sinni, þetta er í raun keppnin Mannkynið deilt með tveimur, og augljóst að efnið er Vesalingum ofarlega í huga, þeir eru ferskir svo að segja. Ég ælta ekki að spá neitt í spilin, hef því miður aldrei séð MR keppa í ár; en ég verð víst að afsala mér Ræðumaður Íslands titlinum til annaðhvort Breka eða Jóa. Það þykir mér leiðinlegt. Einnig vona ég að Morfís nefnd sé búin að redda utanlandsferð, því annars höfum við verið leiknir mjöööög grátt. Ef ekki, vil ég skora á ræðulið sigurliðsins að gefa okkur sína utanlandsferð og semja við sigurvegara næsta árs um að þeir fái þeirra ferð. Þá myndast keðja, þannig að vinningsliðið fer alltaf ári síðar, en mér finnst það bara allt í lagi, þá væri allavega búið að kippa þessum leiðindum í lag. MRingar og Verzlingar, hugsið um þetta; ég er ekki að grínast.
\\
Undur og stórmerki í skólanum í dag. Svo virðist sem Hreiðar Már Hermannsson, hinn ágæti (að undanskilinni frjálshyggjuhugsjón) framkvæmdastjóri NFMH var rekinn úr skólanum sökum lágs mætingarhlutfalls. Hann fær ekki að nema við skólann á næstu önn og þ.a.l. er hann neyddur til þess að draga forsetaframboð sitt til baka. Þá eru eftir Alma og Kung-Fu Keli. Og ég hef ekki séð eina einustu auglýsingu frá Kela; er hann að djóka eða ekki? Og þá er Alma svo gott sem sjálfkjörin, sem er alltílæ, en dregur samt úr spennu. Hún er örugglega stressuð yfir þessu öllu saman.

:: Atli 15:51 [+] :: ::
...