:: keipdúnkur atla bollasonar ::

:: velkomin :: bollason[hja]gmail.com :: plotusafn (gamalt) ::
[::..tenglar..::]
:: bolladóttir [>]
:: brissó [>]
:: tobbi túkall [>]
:: pjotr-beikon [>]
:: oddur [>]
:: halastjarnan erla [>]
:: steini teague [>]
:: kalli (aka sverrir) [>]
:: bragi málefnalegi [>]
:: heklurnar [>]
:: sandra sello [>]
:: dagga [>]
:: orri tomasson [>]
:: atli vidar [>]
:: doddeh [>]
:: doktor sindri [>]
:: daily photo [>]
:: ragga sturlada [>]
:: baldur.april.is [>]
:: alma [>]
:: stígur lýgur [>]
:: krummi [>]
:: heilagur hrafn [>]
:: dagar puka [>]
:: the big jko [>]
:: sólveig helgabarn [>]
:: kpt. kata litla [>]
:: sólberg [>]
:: steindór [>]
:: kommóðan [>]
:: biggi [>]
:: frikki [>]
:: herra garðar [>]
:: steinþór helgi [>]
[::..gamalt..::]
12/01/2002 - 01/01/2003 01/01/2003 - 02/01/2003 03/01/2003 - 04/01/2003 04/01/2003 - 05/01/2003 05/01/2003 - 06/01/2003 06/01/2003 - 07/01/2003 07/01/2003 - 08/01/2003 08/01/2003 - 09/01/2003 09/01/2003 - 10/01/2003 10/01/2003 - 11/01/2003 11/01/2003 - 12/01/2003 12/01/2003 - 01/01/2004 01/01/2004 - 02/01/2004 02/01/2004 - 03/01/2004 03/01/2004 - 04/01/2004 04/01/2004 - 05/01/2004 05/01/2004 - 06/01/2004 06/01/2004 - 07/01/2004 07/01/2004 - 08/01/2004 08/01/2004 - 09/01/2004 09/01/2004 - 10/01/2004 10/01/2004 - 11/01/2004 11/01/2004 - 12/01/2004 12/01/2004 - 01/01/2005 01/01/2005 - 02/01/2005 02/01/2005 - 03/01/2005 03/01/2005 - 04/01/2005 04/01/2005 - 05/01/2005 05/01/2005 - 06/01/2005 06/01/2005 - 07/01/2005 07/01/2005 - 08/01/2005 08/01/2005 - 09/01/2005 09/01/2005 - 10/01/2005 10/01/2005 - 11/01/2005 11/01/2005 - 12/01/2005 12/01/2005 - 01/01/2006 01/01/2006 - 02/01/2006 02/01/2006 - 03/01/2006 03/01/2006 - 04/01/2006 04/01/2006 - 05/01/2006 05/01/2006 - 06/01/2006 06/01/2006 - 07/01/2006 11/01/2006 - 12/01/2006 12/01/2006 - 01/01/2007 01/01/2007 - 02/01/2007 02/01/2007 - 03/01/2007 03/01/2007 - 04/01/2007 04/01/2007 - 05/01/2007 05/01/2007 - 06/01/2007 06/01/2007 - 07/01/2007 07/01/2007 - 08/01/2007 10/01/2007 - 11/01/2007 11/01/2007 - 12/01/2007 12/01/2007 - 01/01/2008 01/01/2008 - 02/01/2008 02/01/2008 - 03/01/2008 03/01/2008 - 04/01/2008 04/01/2008 - 05/01/2008 05/01/2008 - 06/01/2008 06/01/2008 - 07/01/2008 08/01/2008 - 09/01/2008 09/01/2008 - 10/01/2008 01/01/2009 - 02/01/2009 02/01/2009 - 03/01/2009 04/01/2009 - 05/01/2009 12/01/2009 - 01/01/2010

:: miðvikudagur, nóvember 28, 2007 ::

Ég var að koma heim af tónleikum. (Að vísu með smá stoppi til að aðlaga heimildaskrá í ritgerð við heimspekiskor og öðru til þess að gúffa hálfum Nonnabita í mig.) Hljómsveitin sem lék nefnist For a Minor Reflection og var að senda frá sér skífu sem, ólíkt sveitinni, ber íslenskan titil - Reistu þig við, sólin er komin á loft... - og sama gildir um lagatitlana sex.

For a Minor Reflection leika síðrokk. Það er engum blöðum um það að fletta. Ekkert skástrik neitt. Og hún gerir það vel, mjög vel. Hún tekur allar síðrokksklisjurnar, og hún leikur sér ekki að þeim, heldur hefur hún þær yfir eins og árið sé 1999. Og þetta gerir hún skammarlaust og af fullri alvöru. Fyrir vikið tekst sveitinni á vissan hátt að verða kvintessentalísk, plata hennar er mögulega betri viðmiðunarpunktur fyrir greinina en Young Team eða Lift Yr. Hands Like Antennas to Heaven þótt vissulega megi setja út á einsleitni og fyrirsjáanleika ef skapið býður manni svo.

Ég hlustaði rosalega mikið á síðrokk í tíunda bekk og á fyrstu árunum mínum í menntaskóla. Líklega hófst ferillinn fyrir alvöru þegar vinir mínir kveiktu á forvitninni og gáfu mér Ten Rapid í afmælisgjöf vorið 2001, en þar á undan hafði liðsbróðir minn úr Réttó, Biggi Burger, lánað mér Come on Die Young úr safni bróðurs síns. Áður en árið var úti held ég að ég hafi verið kominn langleiðina með Mogwai katalóginn, sama gilti um Godspeed..., og svo var ég farinn að teygja aðeins úr mér - TNT átti ég í lok sumars, og ég man ennþá þegar ég halaði niður lagi númer sex af ( ) og lék í gegnum græjurnar inni hjá mér, líklegast um vorið ári síðar. Í millitíðinni man ég eftir mér á fimmtán manna tónleikum í Cösu þar sem hljómsveitir eins og Lúna og Sofandi gutluðu við sína gítara, og Dikta (þá fremur ný sveit) lék sama leik í Norðurkjallara. „Cody“ var einsog prósak fyrir mig áður en átök morfískeppnanna riðu yfir á þessum árum.

Með áhuga mínum á bílskúrsrokki tuttugustuogfyrstu aldarinnar dalaði áhuginn, og ég hef t.a.m. aldrei brugðið sveitinni Explosions in the Sky undir geislann.

En ég hlustaði rosalega mikið á síðrokk sextán sautján átján ára, og mér fannst sem allur MH væri í svipuðum hugleiðingum. Og ég held að það hafi ekki bara verið tíðarandinn, 11. sept. og allt það, enda kom hann hálfpartinn í rassgatið á þessu öllu saman. Ég held frekar að síðrokk sé einhverskonar myndhverfing, eða hljóðhverfing, fyrir táningsárin. Dýnamíkin, crescendóin, endurtekningin og tilfinningaflóðið - kaþarsis - sem fylgir því að hlusta á þessa tónlist er gríðarlegt, í rauninni bráðnauðsynleg rás fyrir flóknar tilfinningar þessa tíma, og miklu betri og óræðari en Belle & Sebastian eða Smiths nokkurntímann í þessum tilgangi - sveitir sem virka kannski fyrir breska unglinga en geta ekki náð til hinna íslensku sem ekki skilja orðin, og orðin skilja ekki heldur kuldann og myrkrið svo merkingin nær aldrei landi. Myndhverfingarnar sökkva á leiðinni.

Í síðrokki er merkingin fljótandi, hún er ísjaki, hún er á vonlensku, hún er jafnóskiljanleg og það sem bærist í huganum, jafnósýnileg og níutíunduhlutahulin ísbreiðan.

Þess vegna held ég að nú, fyrst síðrokk er einusinni komið fram, þá muni það seint hverfa, heldur einungis sveiflast fram og til baka í vinsældum, og ég held að tíðnin verði fremur há.

Önnur ástæða fyrir því að síðrokk talar svo til táninga er líkindi tónlistarinnar við samfarir. Þegar samfarir eru það eina sem kemst að í kynóðum og hormónamettum huganum á manni er fátt sem veitir jafnmikla fróun og tónlist sem er beinlínis hljóðræn yfirfærsla á ferlinu. Sama eins eða tveggja takta gítarlínan er endurtekin í sífellu og af sífellt meiri styrk og ákefð, og smám saman bætast hin hljóðfærin ofan á og styrkja vegginn, bæta í hann og breyta ásýnd hans þótt sama hreyfingin (mjaðmahnykkurinn) sé þarna í grunninn. Þessi uppbygging getur tekið nokkrar mínútur og þá er stigið á bjögunarpedalann og öllu sleppt lausu. Bjögunin varir vitaskuld aldrei jafnlengi í mökunum eins og í tónlistinni, enda er hún ímyndun, draumsýn, búin út af þeim sem hefur litla eða enga reynslu af ferlinu og hefur konstrúerað stjörnuhallir um hvernig atlotin eiga að vera. Þess vegna tekur oft við nýtt ferli, ný uppbygging, ný eðlun, um leið og hin hefur undið ofan af sér á miklu miklu styttri tíma en tók að snúa hana í gang.

Ef samfarir væru í moll, myndu þær hljóma eins og For a Minor Reflection eða Mogwai. Og á þessum árum voru mök oft í moll, og hjá mörgum eru þau það eflaust enn, full af óöryggi og sorg.

:: Atli 00:14 [+] :: ::
...
:: mánudagur, nóvember 26, 2007 ::
Ég er að fylla út einhvern svona annál sem Nýtt líf verður með í desember eða janúarblaðinu sínu. Þetta er alltaf jafnerfitt, samt læt ég alltaf hafa mig út í þetta með misjöfnum árangri. Mér fannst mér samt takast vel upp í Víðsjá í fyrra. Hins vegar græt ég það mjög að líklegast fæ ég ekki að útbúa plötuárslista hjá Mbl. þar sem ég fæ ekkert að gagnrýna aftur fyrr en eftir jól.

Bloggið mun þó ekki klikka.

:: Atli 15:53 [+] :: ::
...
:: mánudagur, nóvember 19, 2007 ::
Ég hlakka meira til jólanna en oft áður. Ég tel að þetta stafi af tvennu. Í fyrsta lagi er tilhlökkun vegna jólanna samofin tilhlökkun vegna heimkomu Svölu um miðjan desembermánuð. Í öðru lagi eru engin próf og engin ritgerðaskil í fyrsta sinn í sextán ár og því meiri tími til að pæla í öllu sem jólalegt er.

:: Atli 19:20 [+] :: ::
...
:: miðvikudagur, nóvember 14, 2007 ::
Mér sýnist molahöfundur Moggans (Ásgeir? Jóhann? Arnar? Höskuldur?) vera að skapa meiri úlfaþyt í kringum Lesbókargreinina en efni standa til. Sjálfur hef ég ekkert fengið nema jákvæð viðbrögð við „svokallaðri“ greiningu minni í tölvupóstum, spjalli og smsum, og mér sérstaklega hrósað fyrir að taka smekklega á tvöfaldri stöðu minni. Þar á meðal er fólk af krúttkynslóðinni, enda er greinin ekki síst skrifuð til að varpa ljósi á hvað sú hreyfing stóð fyrir. Gúgl-sessjón hefur auk þess ekki leitt nein viðbrögð í ljós, svo það eru í besta falli ýkjur að kalla viðbrögðin „sterk“. Það væri því gaman að vita hverjir þessir „margir“ sem eru svona „æfir“ eru.

Ef þetta reynist hins vegar satt væri gaman að fá að heyra frá einhverjum, og þá hvaða athugasemdir viðkomandi hefur. Kannski það verði til þess að poppa eitthvað upp poppumræðuna.

:: Atli 09:43 [+] :: ::
...
:: þriðjudagur, nóvember 13, 2007 ::
Pælið í pómóheitum. Ég er að þjálfa Morfíslið (FG) og umræðuefni keppninnar er Morfís - við á móti.

:: Atli 23:28 [+] :: ::
...
:: laugardagur, nóvember 10, 2007 ::
Í Lesbók í dag: Einn vænn hlemmur um krúttin og hið nýja.

:: Atli 11:53 [+] :: ::
...
:: fimmtudagur, nóvember 08, 2007 ::
Annars vil ég vekja athygli á lélegustu grein um fjölmiðlun og menntun sem ég hef lesið lengi.

:: Atli 16:59 [+] :: ::
...
:: miðvikudagur, nóvember 07, 2007 ::
Það er ýmislegt bogið við kosningu mbl.is/Moggans um bestu íslensku plötu allra tíma. Í fyrsta lagi stendur kosningin yfir í heila þrjá eða fjóra daga. Í öðru lagi er engin leið að finna þetta á mbl.is (ég fer alltaf í gegnum link á blogginu hans Dr. Gunna). Í þriðja lagi kemur hvergi fram hverjir stóðu að tilnefningunum. Í fjórða lagi eru tilnefningarnar oft á tíðum ansi skrítnar - eru menn t.d. ekki fullfljótir að tilnefna Hold er mold Megasar sem bestu íslensku plötu allra tíma. Það eru alveg tvær eða þrjár vikur síðan hún kom út. Að fleiru mætti finna - af hverju eiga Mínus tvær plötur á listanum en Gusgus og Benni Hemm Hemm enga (svo dæmi sé tekið)? Af hverju Takk... frekar en ( )? Hvar er Rúnk? Og fyrst að Holdið og Ólöf Arnalds og fleiri plötur sem komu út í vikunni eru þarna, hvar er þá Sprengjó?

Ég er þó ánægður með eitt, að það sé ekki verið að púkka upp á Mugimama. Lonely Mountain er svo miklu miklu betri skífa.

:: Atli 10:27 [+] :: ::
...
:: þriðjudagur, nóvember 06, 2007 ::
22. eða 23. september síðastliðinn gaf Fréttablaðið út blað um menningu, eins konar Lesbók. Ég gat ekki skilið útgáfuna og textana í kringum hana öðruvísi en að þetta ætti að verða reglulegt. En það hefur ekkert bólað á öðru tölublaði. Hvar er menningin á Fréttablaðinu?

:: Atli 14:38 [+] :: ::
...
Blaðið er farið.

Stúdentar! Bíðið spenntir við lúgur yðar! Aðrir! Farið á fjölfarinn stað!

:: Atli 11:39 [+] :: ::
...
:: sunnudagur, nóvember 04, 2007 ::
Nafni minn Fannar á 24 stundum er líka ánægður:
„Tímarnir okkar er sú skífa sem íslensk popptónlist hefur beðið eftir. [...] Ef þú ætlar að kaupa þér eina breiðskífu á þessu ári og ert af einhverjum ástæðum ekki búin/n að því, kauptu Tímana okkar.“ *****
Ég kann honum bestu þakkir fyrir þessi fögru orð.

Þessu ótengt: Mér finnst Mogginn fara fullgeyst í einkunnagjöf sinni. Allavega átta íslenskar poppplötur hafa fengið fullt hús - fimm stjörnur - á síðum Morgunblaðsins það sem af er ári, og jafnmargar árið 2006. Mín skoðun er sú að fimm stjörnur séu algjört spari. Þær á bara að draga fram þegar skífa er virkilega frábær, gallalaus, og ég á erfitt með að trúa því að hér, á litla Íslandi, komi nema tvær til þrjár svoleiðis skífur út á ári, ef svo mikið. Stjörnur hljóta nokkurnveginn að dreifast á normalkúrvu, langflestar plötur fá þrjár stjörnur, færri tvær og fjórar og örfaáar eina og fimm. Sjálfur hef ég (frá því í september 2005) í tvígang gefið fimm stjörnur, og í tvígang eina stjörnu. Að meðaltali hafa íslenskar plötur sem ég hef gagnrýnt fengið 2.862745098 stjörnur; tæplega þrjár.

Gagnrýni er rituð af umhyggju fyrir tónlistarmönnunum, hún á að hjálpa listamönnunum að skerpa á list sinni. Það gerist ekki ef allt er bara frábært eins og það er og engu þarf að breyta.

:: Atli 14:51 [+] :: ::
...

This page is powered by Blogger. Isn't yours?
:: gestir ::
Weblog Commenting by HaloScan.com