:: keipdúnkur atla bollasonar ::

:: mánudagur, febrúar 28, 2005 ::

Þeim sem hafa boðið fram aðstoð sína við að redda mér aftur tónlist sem ég tapaði hljóta miklar þakkir fyrir - ég var bara nokkuð snortinn yfir hversu margir buðu fram hjálp svo fljótt. Annars ligg ég uppí rúmi - og ekki að ástæðulausu. Ég var eitthvað órólegur í maganum þegar ég var á leiðinni heim úr skólanum og ákvað að leggja mig og vonaði að þetta myndi hverfa þannig. Síðan var ég vakinn í mat kl. hálfátta. Mér var ennþá illt í maganum og gríðarlega lystarlaus. En ég lét mig þó hafa það að borða tvo kálböggla, enda þykja mér kálbögglar (soðnar kjötfarsbollur vafðar inn í hvítkál og feiti hellt yfir) mjög góðir. Þeir stoppuðu ekki lengi við og mér tókst að skila þeim í eldhúsvaskinn áður en langt var um liðið. Þá lagðist ég uppí rúm, sótti mér tölvuna og ætlaði að gera tilraun til að læra aðeins. Það var rétt að fara í gang þegar ég stökk fram á bað og dældi mörgum gusum í viðbót í klósettið. Það sem er skrítnast er samt að ég er ekkert slappur og er meiraðsegja í nokkuð góðu skapi. Meinið er einskorðað við magann.

:: Atli 20:46 [+] :: ::
...

Mig langar til þess að drepa einhvern. Eftir að hafa eytt sl. þrem til fjórum vikum eða svo í að flytja inn allt geisladiskasafnið mitt (og annarra) var ég búinn að koma 7500 lögum f. á iPoddinum mínum. Þegar við Svala vorum að klippa myndina um eggið þurftum við að búa til smá diskpláss og þá henti ég mp3 möppum framan úr stafrófinu og víðar - ég átti skjölin hvort eð er til á iPoddnum. Áðan var ég að fikta í honum Flóka (en það er nafn iPoddsins) og stillti á automatic update f. valda playlista. Ég hélt náttúrulega að það þýddi að iPoddinn myndi uppfæra ákveðna playlista, en ekki laga allt helvítis libraryið að playlistanum. En nei, eftir sat ég með iPod sem hafði library á stærð við einn playlista, þar sem áður höfðu verið rúm 30 GB. Fokk, hugsaði ég, en sem betur fer hafði ég bara losað mig við A og hluta af B og örlítið meira. En A og hluti af B og örlítið meira eru 80 geisladiskar! Ég þarf að endurflytja inn 80 geisladiska. Og þá er ótalin sú tónlist úr þessum hluta stafrófsins sem ég á bara til á tölvutæku formi. Ef einhver getur reddað mér Louden Up Now m/ !!!, Anniemal m/ Annie, Funeral m/ Arcade Fire, Everybody Hertz m/ Air, Parallel Universe m/ 4Hero, Sung Tongs m/ Animal Collective, Confield m/ Autechre, Pop Loops for Breakfast m/ B. Fleischmann þá er þessara plat(n)a sárt saknað. Ég hef ekki verið svona pirraður í áraraðir.

:: Atli 00:17 [+] :: ::
...

Ég veit að sl. færslur hafa ekki verið sérlega innblásnar, en ég hef bara verið fremur upptekinn. Auk þess er ég jafnvel að hugsa um að fækka færlsum og vanda hverja betur, en það kemur í ljós.
•••
Rösquiz í gærkvöldi fór ágætlega, þó mér hafi skilist að spurningarnar sem ég smíðaði hafi verið í erfiðari kantinum. Dæmi:

Franski dúettinn Air gaf út „remix“-plötu sem innihélt endurhljóðblandanir af lögum sem voru á annarri plötu þeirra, 10.000 Hz Legend. Þar spreyttu sig m.a. hiphopp-dúettinn Neptunes og dansmógúllinn Mr. Oizo sig á laginu „Don't Be Light“. Hvað hét þessi „remix-plata“ og með hvaða rokkhljómsveit er lagið sem titill plötunnar vísar í?

Hljómsveitin Kraftwerk hélt einkar vel heppnaða tónleika hér á landi í maí sl. hljómsveitin hefur starfað allt frá 1971, en þá kom fyrsta platan, Kraftwerk 1, út. Önnur platan hét einfaldlega Kraftwerk 2, en sú þriðja ber skírnarnöfn stofnenda hljómsveitarinnar, en þeir voru tveir. Hvað heitir platan?

Enska hljómsveitin Libertines, sem reyndar er nýhætt, hefur hlotið nokkuð umtal sl. ár, ekki síst fyrir heróínfíkn forsprakkans Pete Doherty. Hljómurinn á nýjustu plötu þeirra þykir hrár og flottur, og platan tekin upp í Abbey Road. Upptökum stýrði gamall pönkhundur, hvað heitir hann og í hvaða hljómsveit var hann?

Hann hefur hannað plötuumslög fyrir Audioslave, Led Zeppelin, Mars Volta, Muse, 10cc, Blac Sabbath o.fl., en þekktastur er hann fyrir hönnun sína á umslögum Pink Floyd og þá sérstaklega Dark Side of the Moon. Hver er maðurinn?

Mikil dulúð hefur verið í kringum tengsl Jacks og Meg White í hljómsvetinni White Stripes. Margar sögur hafa spunnist og á tímabili virtist enginn vita hvað var satt og hvað var logið. Ég spyr, hvað er satt í þessu máli, hvernig eru Jack og Meg tengd (fyrir utan það að vera saman í hljómsveit)?

...og ellefu aðrar í svipuðum dúr. Veit einhver lesenda keipdúnksins svörin við þessum fimm spurningum?

:: Atli 17:21 [+] :: ::
...

Spurningakeppnin Rösquiz fer fram á Stúdentakjallaranum í kvöld. Sniðið er næstum því alveg einsog Pub Quiz það er fram fer á Grandrokk á föstudögum. Lesendur keipdúnksins eru eindregið hvattir til að mæta að þessu sinni, því spyrill verður enginn annar en ykkar ástkæri umsjónarmaður keipdúnksins, Atli Bollason, og mun þemað að þessu sinni vera dægurtónlist sl. fjörutíu ára. Þátttökugjald er hundrað krónur, en verðlaunin eru bjórkippa og svo er að sjálfsögðu ein bjórspurning. Ég treysti á að sem flestir mæti og styðji við bakið á karlinum.

:: Atli 15:57 [+] :: ::
...

Ég er enginn sérstakur nátthrafn, yfirleitt kominn upp í rúm fyrir klukkan hálfeitt. En síðustu nótt skreið ég undir sæng klukkan kortér yfir sjö. Að morgni. Ég og Svala vorum að klippa stuttmyndina Eggjandi sem hún átti að skila sem verkefni í dag. Ég hef aldrei klippt kvikmynd á ævi minni, og ekki Svala heldur, en ég tel að úr hafi orðið frábær mynd, studd af frábærri tónlist eftir Erik Satie. Ég vaknaði klukkan átta og skutlaði systur minni í skólann. Þá lagði ég mig aftur í þrjár klukkustundir, eða fram að fundi sem ég átti með ræðuliði bókmenntafræðiskorar. Ég er alvarlega að hugsa um að leggja mig núna, tæpir fjórir tímar á nóttu eru ekki vænlegir til vinnings.
•••
Gerði annars góð kaup á geisladiskamarkaði Hagkaupa í gær. Móri, Dave Brubeck, Dave Brubeck Quartet, Skárren ekkert, Blondie og Davíð Þór Jónsson á rétt rúmar þrjúþúsund krónur.

:: Atli 14:15 [+] :: ::
...

Skrall. Það er heldur betur búið að vera skrall á mér, og því er hvergi nær lokið. Ég, Orri og Leó áttum ánægjustundir í eldhúsinu hjá mér á fimmtudagskvöld og langt fram á föstudagsmorgun. Föstudagurinn einsog hann lagði sig fór í æfingu/djamm-sessjón hjá hljómsveitinni Nortón. Ég hélt síðan í vísindaferð hjá bandaríska sendiráðinu. Það var mjög fróðlegt, og bókmenntafræðinemar hikuðu ekki við að spyrja um Írak, Guantanamo flóa, Abu Ghraib og fleira. En spjallið snéri líka að mennta- og heilbrigðiskerfi Bandaríkjanna, gildi skiptináms, hlutverki sendiráða o.fl. Að því loknu hélt ég í stutta heimsókn til Össa 7berg, og þaðan í partí hjá Auði, forsætu Torfhildar. Ég hafði ekkert borðað síðan við Kári elduðum okkur sveitta beyglu í hádeginu, svo Vitabar veitti mér þennan líka ágæta ostborgara og bjór um níuleytið. Hinn alltaðþví viðbjóðslegi vínveitingastaður Nelly's átti tíu ára afmæli og bauð upp á bjór á tíu krónur. Í alvörunni. Að vísu var takmarkað magn á einstakling, en ég gat samt keypt fimm stk. (á fimmtíu krónur!). Ég gaf flest þeirra en neytti tveggja. Röskva þakkaði fyrir stuðning kjósenda á Prikinu svo ég lét sjá mig þar og eyddi bróðurparti kvöldsins þar. Eftir stutt stopp á Bar 101 hélt ég ásamt Kristínu Tómas og vinkonum á Kaffibarinn. Stemmningin draup ekki beinlínis af hverju strái og ég var ekki sá ferskasti. Kristín var á bíl og skutlaði mér heim, og eftir spjall við systur mína setti ég Nick Drake í eyrun og sofnaði við bleikt tunglsljós.
Í kvöld ætla ég í tvítugsafmæli Jóhanns Alfreðs, og á morgun ætla ég ekki að gera neitt. Bókstaflega.

:: Atli 12:53 [+] :: ::
...

Já, Sideways er jafn góð og verið er að tala um. Sá hana í gærkvöldi í fylgd með Sunnu.
En mér finnst kominn tími til að tjá mig eitthvað um liðna helgi og atburði hennar, bloggið frá fimmtudagskvöldinu (eða föstudagsmorgninum öllu heldur) veitir nefnilega ekkert sérstaklega mikla innsýn.
Á fimmtudaginn lauk semsagt kosningunum til stúdentaráðs. Niðurstöðurnar voru þær að Vaka missti mann yfir til Röskvu. Það þýðir að Háskólalistinn er í oddastöðu, og enn er óvíst hvað það merkir nákvæmlega. En ég er afskaplega sáttur við að hafa fellt meirihlutann og sé fram á bjartari tíma fyrir SHÍ.
Heimabar Röskvu, Grandrokk, hýsti okkur á fimmtudagskvöldið, en þar voru Röskvuliðar úr öllum áttum samankomnir til að skemmta sér og bíða eftir niðurstöðum kosninganna. Áður en þangað var haldið var hist á Kaffi Viktor og maginn fylltur af mexíkóskum kræsingum. Og frönskum bjór. Stemmningin var góð og átti bara eftir að batna. Hljómsveitin Bermúda (held ég) stóð sig einstaklega vel og er þarna örugglega komin ein ferskasta kóver-hljómsveit landsins, en hún fór vel með gullmola einsog „Cosmic Girl" og „Crazy in Love". Bjórinn var á 350 kr. og því ekkert því til fyrirstöðu að fá sér nokkra. Það var ekkert stress í mér - framan af. En um leið og ég sá að formaður kjörstjórnar var komin í hús þá fór maginn á mér í hnút. Kristín Tómasdóttir vinkona mín fór í kerfi sökum streitu (og ölvunar) og þorði ekki að horfa upp á úrslitin tilkynnt. Lillý, formaður kjörstjórnar, tók algjöran oddadómara á þetta og ýjaði jafnvel að því að Vaka héldi meirahlutanum. Slíkir tilburðir jóku enn á spennufallið sem átti sér stað þegar í ljós kom að við höfðum bætt við okkur manni. Fagnaðarlætin voru gífurleg og teygðu sig út á götu og inn á Laugaveg 66, en þar var haldið áfram að djamma til klukkan fjögur. Vökuliðar voru margir hverjir mættir á svæðið þegar síga tók á seinni hlutann. Ég átti fróðleg samtöl við menn sem halla til hægri og styðja jafnvel George Bush Bandaríkjaforseta, en ég hef aldrei hitt neinn sem gerir það í fullri alvöru - fyrr en nú.
***
Þegar ég vaknaði á föstudagsmorgunn leið mér alveg ótrúlega vel. Sólin skein, Svala við hlið mér, ég með sæti í stúdentaráði og í fríi í skólanum (einsog alla föstudaga). Eftir hangs til rúmlega hádegis héldum við Svala niður á Prik þar sem við borðuðum ljúffengar samlokur. Ég átti eftir að sitja á Prikinu langt fram eftir degi, en þangað slæddust gáfumenni á borð við Jóhann Alfreð, Helga Hrafn og Björn Braga. Saman skunduðum við á Pub Quiz á Grandrokk og fórum út með (einn) bjór í hönd. Hann kom í góðar notir þegar tók að kvölda því Synir Skallagríms funduðu heima hjá mér þetta kvöld. Þar með lauk fyrsta starfsári okkar, en það tók 21 mánuð. Fundurinn var stórgóður, hófst með smá einleik okkar Orra og Þorvaldar sem snæddu með mér hamborgara. Síðan tók við spjall og bjórdrykkja til klukkan þrjú, en þá fóru sumir heim og aðrir ekki. Síðustu menn sofnuðu milli fimm og hálfsex. Það er ótrúlegt hversu góður félagsskapur þessi klúbbur er, því hann brýtur allar viðteknar venjur um vináttu - þ.e.a.s. vinskapurinn er að miklu leyti framleiddur, hann er búinn til. En engu síðri fyrir vikið.
***
Ég vaknaði til þess að fara að vinna á laugardaginn. Þá var Baldur Kristjánsson ennþá sofandi í kjallaranum hjá mér. Kjallarinn, sem hefur verið ónotaður nú um nokkurra mánaða skeið hefur heldur betur hlotið uppreisn æru, því ekki er nóg með að Baldur hafi gist þar þessa nótt, heldur tók hljómsveitin Nortón sig til og stillti upp æfingaaðstöðu þar í fyrsta skipti í meira en ár. Sunnudagseftirmiðdegið fór einmitt í það, en kvöldinu áður höfðum við Svala og Leó leigt okkur This is Spinal Tap, sem var ágæt en bliknar í samanburði við mokkjúmentaríið The Rutles sem er af svipuðum meiði.
***
Annars er kallinn (ég) bara sáttur við keipdúnk, er að verða búinn að flytja alla geisladiskana mína inn og á dagskránni er helst það að vinna upp þann lærdóm sem ég varð af sl. tvær vikur í sambandi við kosningabaráttuna. En þið þekkið mig og vitið að ég er alltaf til í gott geim ef þess þarf. Hringið bara.

Plötur
Hot Chip: Coming on Strong
og eitthvað fleira.

:: Atli 12:13 [+] :: ::
...

Loksins hefur þögull meirihluti Vöku misst sín völd. Stúdentar geta farið að hafa nokkurn skapaðan hlut um eigin málefni og annarra að segja. Röskva og Vaka hlutu báðar fjóra fulltrúa, en Háskólalistinn átti hinn níunda fulltrúa. Þetta þýðir að einokun Vöku er loks lokið og stúdentapólitíkin getur farið að skipta einhverju máli aftur. Ég þakka öllum sem greiddu okkur atkvæði sitt. Takið því rólega. Nússssshjaaa!

:: Atli 04:19 [+] :: ::
...

Í dag og á morgun eru kosningar til Stúdentaráðs Háskóla Íslands. Ég sit í þriðja sæti á framboðslista Röskvu til stúdentaráðs.
Síðastliðin ár hefur starfsemi stúdentaráðs drabbast niður. Rödd stúdentaráðs hefur verið veik þrátt fyrir að hvert stóráfallið á fætur öðru hafi dunið yfir okkur. Nú síðast slitnaði upp úr samstarfi SHÍ við hinar námsmannahreyfingarnar sem þýðir að við höfum enga samningsstöðu t.d. gagnvart LÍN. Slík tíðindi bera vott um hversu erfitt og ósamstarfsfúst núverandi stúdentaráð hefur verið. Röskva vill að stúdentaráð verði virkt og sýnilegt og nái aftur því forystuhlutverki sem það hafði - og sem það á að hafa. Ég hvet því alla lesendur keipdúnksins sem stunda nám við HÍ til þess að nýta sér kosningarétt sinn og merkja við Röskvu, því þá munu verða breytingar, þá munu orðin jafnrétti til náms öðlast merkingu.

:: Atli 18:24 [+] :: ::
...

Jæja, þá er heygaffallinn búinn að birta lista yfir 100 bestu plötur þess sem af er áratugarins. Ekki nóg með að hann hafi notið góðs af hugmyndinni minni, heldur eru listarnir um margt líkir, þó ritstjórarnir virðist hafa breytt röðinni til þess að ekki væri hægt að rekja listann til mín. Einnig gefur augaleið að þeir hafa valið fimmtíu plötur til viðbótar inn á listann til þess að ná upp í hundrað. Þær virðast hafa verið valdar að handahófi, og raðað inn á hann handahófskennt, t.d. með þeim afleiðingum að plata Jay-Z, The Blueprint, lenti í öðru sæti. Unicorns verma 99. sæti og Room on Fire 97., en hjá mér voru þessar plötur í öðru og þriðja - þ.e. þeir hafa hvolft listanum til að byrja með. Toppplatan mín endaði reyndar í sextánda. Kannið þetta og kynnist samtímanum. Ég hef samt á tilfinningunni að ef annar svona listi yrði unninn eftir ár, eða tvö, eða fimm; þá myndi hann líta dálítið öðruvísi út.

Plötur
Pavement: Wowee Zowee
TV on the Radio: Young Liars
Max Tundra: Cakes

:: Atli 18:28 [+] :: ::
...

Mér hlotnaðist sá heiður að fylgjast með hinum austurríska Fennesz troða upp í Klink & Bank áðan. Ég hef ekki mikið hlustað á hann, en veit að hann er mikils metinn í raftónlistarheiminum og víðar. Til dæmis mætti benda á að lesendur vefritsins Brainwashed dot com völdu plötu hans Venice bestu plötu ársins 2004. Tónlistinni mætti lýsa sem sveimkenndri raftónlist, þar sem trommutaktar eru víðsfjarri og mikið gert út á andrúmsloft. Lögunum er síðan drekkt í stafrænu surgi og hávaða svo hlustandinn þarf að hafa sig allan við til að koma eyra á lögin sjálf. Stórkostleg skemmtun og alltaf gaman að við Íslendingar getum fengið svona nöfn til að spila.
Annars er ég svo þreyttur að ég er bara kominn heim um miðnætti á laugardagskvöldi og stefni á háttinn hvað og hverju. Dreifing kosningablaðs Röskvu í hundraðogfjórum tók sinn tíma (og er enn ekki lokið) og sinn skerf af líkamlegri orku.
Að lokum þakka ég öllum þeim sem komu og tóku þátt í Svitaballi Röskvu í gærkvöldi. Stemmningin var afar góð þó nokkuð hafi verið farið að týnast út eftir klukkan eitt hálftvö. Ég var svo heppinn að hljóta verðlaun fyrir að vera sveittastur á ballinu og á ég það að þakka „búningnum“ sem ég klæddist. Sá ljóður er þó á að fötin sem ég var í eru alls ekkert óvenjuleg og á heitum sumardögum klæðist ég oft nákvæmlega sama setti, þ.e.a.s. brúnum/appelsínugulum hlýrabol og hvítum, stuttum Adidas buxum frá áttunda áratugnum. En inni á bar á föstudagskvöldi hef ég aldrei klæðst slíkum fatnaði fyrr en nú. Það var samt svo þægilegt að það er aldrei að vita nema ég geri það aftur fljótlega.

Plötur
Books: Lemon of Pink
Dungen: Ta det Lugnt
Interpol: Antics
Hrvatski: Swarm & Dither
Snoop Doggy Dogg: Doggystyle
Yes: Close to the Edge
Nico: Chelsea Girl

:: Atli 01:18 [+] :: ::
...

Hvernig læt ég...

...SVITABALL RÖSKVU Á GRANDROKK Í KVÖLD KL. 22
NORTÓN
DJ AMMA

STÓR BJÓR Á 350 KR.

:: Atli 19:04 [+] :: ::
...

Stefna Háskólalistans kann að virðast aðlaðandi og spennandi í fyrstu - en ef hún er skoðuð nánar kemur í ljós að þetta er argasta bull. Einstaklingskosningar eru ekki einfaldar í framkvæmd. Það er lítil von til þess að almennur kjósandi hafi tíma og þrek til að setja sig inn í stefnumál og hugsjónir 40 - 50 frambjóðenda. En jafnvel þó að uppteknum háskólanema tækist að finna sér tíma milli lestrarlota, þá væri enn meiri vinna framundan - hann þyrfti að velja fimmtán einstaklinga úr staflanum. Eftir að hafa klórað sig í gegnum stefnumál þessara 40 frambjóðenda væri maður fljótlega búinn að átta sig á því að auðvelt væri að skipa stefnumálum þeirra í 2 - 4 flokka, eða fylkingar. Hvers vegna ættu þessir einstaklingar ekki að vinna í sameiningu að markmiðum sínum?
Með einstaklingskosningum myndu kosningar til SHÍ taka á sig mun "vinsældarkosningalegri" blæ og hætt er við að málefnin myndu drukkna í egósentrískri umræðu. Fólk myndi reyna að afla sér vinsælda innan sinnar deildar, það myndi sennilega takast, og úr yrði að hver deild myndaði nokkurskonar fylkingu, og stappið stæði um það hvaða deild væri best í hinu og þessu.
Við þetta má bæta að trúverðugleiki Háskólalistans ber virkilegan skaða af því að auk þess að berjast fyrir breyttu kosningakerfi, þá eru þau með nokkur stefnumál. Ef Háskólalistanum væri full alvara, myndi hann að sjálfsögðu hafna því að hann hefði sameiginlega yfirlýsta stefnu í t.d. Lánasjóðsmálum eða varðandi innritunargjöld. Slíkar yfirlýsingar ganga gegn hugmyndinni um einstaklingsmiðað kosningakerfi.

Stúdentaráð yrði ekki hið samhenta afl sem Háskólalistinn vonar, heldur myndu 15 mismunandi skoðanir gera samvinnu í stúdentaráði mun erfiðari. Starfið yrði ekki skilvirkara, heldur seinlegra og stefnulausara. Háskólalistinn vill að kosið sé til eins árs í senn, en það gerir það að verkum að á hverju ári tapast mikilvæg reynsla út úr ráðinu og það minnti meira á nemendafélög framhaldsskóla, þar sem alltaf er byrjað á núlli, með tilheyrandi byrjunarörðugleikum.
Auk þess veita fylkingarnar einstaklingunum nauðsynlegt aðhald, þannig að ákvarðanir þeirra þurfa að vera vel rökstuddar og þeir verða að geta svarað fyrir þær. Þ.e.a.s. fylkingar þurfa að passa upp á orðstír sinn vegna kosninga í framtíðinni, meðan einstaklingar geta hagað sér að vild, því þeirra kjörtímabil rennur út ári síðar.
Fylkingar bjóða líka upp á það að fólk sem er ekki endilega á listum geti starfað með frambjóðendum. Þannig getur fólk sem er t.d. hætt í stúdentapólitík og útskrifað úr háskóla miðlað reynslu sinni til þeirra sem yngri eru.

Kosningar til stúdentaráðs snúast um menn og málefni. Vissulega eru stefnumál Röskvu og Vöku sprottin af sama meiði, en kosningarnar snúast um hvaða leiðir á að fara að markmiðunum og hverju eigi að ná fram, en ekki síst hverjum þú treystir til að taka slaginn fyrir þig. Berðu saman lista Röskvu og lista Vöku, sæti fyrir sæti, og taktu ákvörðun byggða á því. Þannig er kosningakerfi sem virkar.

:: Atli 16:44 [+] :: ::
...