:: keipdúnkur atla bollasonar ::

:: fimmtudagur, maí 26, 2005 ::

NORTÓN ásamt DÁÐADRENGJUM á Sirkus, föstudagskvöldið 27. maí, upp úr klukkan átta. Þessir tónleikar eru svo snemma að það er engin afsökun fyrir því að mæta ekki, þó þið séuð t.d. að útskrifast daginn eftir. Ég býst við hverjum einasta lesanda keipdúnksins. Fastlega.

:: Atli 01:10 [+] :: ::
...

Hið ómögulega gerðist áðan. Ég fyllti iPodinn minn. Nú þarf ég að fara að velja úr. Buhuhuhu.

Plötur
Arcade Fire: Funeral
Animal Collective: Sung Tongs
Futureheads: Futureheads
Dungen: Ta Det Lugnt
og eitthvað fleira.

:: Atli 15:11 [+] :: ::
...

Bergen, einnig þekkt sem Björgvin, er rosalega falleg borg. Mig grunaði að hún væri ansi óspennandi, en hún var allt annað en það. Þar búa um 250.000 manns, og stór hluti þeirra eru stúdentar. Borgin hefur skipulag borgar, svo hún er þétt byggð, þar eru torg og líf á götunum. Útimarkaður við höfnina, margir litlir og skemmtilegir garðar, og langt í leiðinleg svefnhverfi. Mikið um kebab. Og þó hún hafi öll þessi yndislegu borgareinkenni er hún samt dúlluleg á einhvern reykvískan máta. Hún er staðsett í gífurlega þröngum og löngum firði, og háum. Þannig eru tré upp til beggja handa og það tekur mann ekki nema fimm mínútur að komast upp á fjallstindinn, taki maður kláf. Þar er gífurlega fallegt - og hálferfitt að trúa því að maður sé kominn í slíka náttúruparadís svo skammt frá borginni. Tónlistarsenan í Noregi er sterk, og staðsett í Bergen. Ef maður er í hljómsveit, þá flytur maður til Bergen. Ég sá nokkrar nokkuð góðar, og annar hver heimamaður var í hljómsveit. Ég gerði mér ekki grein fyrir því fyrr en ég kom út að síðustu vikur er ég búinn að vera hlusta frekar mikið á norska tónlist; Annie, Shining, Arve Henriksen, Erlend Øye.

En þrátt fyrir fegurð Björgvinar þá fór ég ekki nema svona einusinni út til þess a njóta hennar. Nei, aðalfundur ESIB var svo þétt pakkaður að mér gafst enginn tími til þess. Ég sá borgina eiginlega bara eftir klukkan ellefu á kvöldin, en auðvitað var það líka skemmtilegt. Hápunktar voru nokkrir, sérstaklega kannski annað kvöldið þar sem ég og einn meðlimur svissnesku sendinefndarinnar fórum milli kráa með trommaranum úr bergensku hljómsveitinni Sissy Wash og enduðum á bar sem einhver vinur hans átti - löngu eftir lokun. Þar gafst fólki kostur á að reykja, en það er harðbannað að reykja innandyra í Noregi. Einnig var gaman að á hverju kvöldi fylltist bærinn af ungum krökkum í rauðum buxum. Þetta voru dimítantar, en í Noregi stendur dimisjónin yfir ekki í einn dag, heldur tæpar þrjár vikur. Herbergisfélaginn Milan, frá serbneska hluta Bosníu-Hersegóviníu átti líka skemmtilega spretti, ekki síst þegar hann hafði mök inni á baðherbergi, og lét sér ekkert bregða þegar bæði ég og annar herbergisfélagi komum heim. Hann bað okkur bara um að bíða þar til leiknum lyki.

Semsagt, skemmtileg, en fyrst og fremst stíf og fræðandi ferð. Svo stíf að þegar ég lagðist til svefns í gærkvöldi hafði ég ekki sofið í 40 klukkustundir, séu undanskildar 3 x 30 mínútur í tveimur flugvélum og á flugvellinum í Osló.

Keypti fjórar plötur; The Kinks are Village Green Preservation Society með Kinks í þriggja diska deluxe útgáfu, Oscillons from the Anti-Sun sem er þriggja diska B-hliðabox frá Stereloab, Fantasma með Cornelius (bara vegna þess að Pétur sagði að hann væri svo góður), Emotional Trabants keypti ég í fríhöfninni, og ég vottaði heimamönnum virðingu mína með því að festa kaup á besta lagi í heimi: „Heartbeat“ tólf tommunni með Annie. Verst að bæði remixin eru ömurleg.

:: Atli 20:03 [+] :: ::
...

Ekkert nýtt að frétta hér:

You scored as Socialist. <'Imunimaginative's Deviantart Page'> Socialist 92% Democrat 92% Anarchism 83% Green 83% Communism 75% Republican 17% Nazi 0% Fascism 0% What Political Party Do Your Beliefs Put You In? created with QuizFarm.com

Plötur
Shining: In the Kingdom of Kitshc You Will be a Monster

:: Atli 16:39 [+] :: ::
...

Ég er búinn að vera alveg trylltur á LimeWire og Soulseek og öllu þessu í kvöld og nótt. Auk þess hef ég átt í MSN-spjalli við indílúðann og góðmennið Pétur Be?kon. Ég hef verið að þrýsta á hann að útbúa svona bestu plötur síðustu fimm ára lista og hann varð loks við því. Síðan var hann svo góður að steypa listunum okkar saman í einn. Það var áhugavert:

pétur says: (1:36:56)
1. The Unicorns – Who Will Cut Our Hair When We’re Gone?
2. Radiohead - Kid A
3. The Strokes – Is This It?
4. The Books – The Lemon Of Pink
5. Interpol – Turn On The Bright Lights
6. Rúnk – Ghengi Dahls
7. Múm – Yesterday Was Dramatic, Today Is Ok
8. The Rapture – Echoes
9. Air – 10.000 Hz Legend
10. Mu – Afro Finger & Gel

Svo er ég að sækja þetta Cocorosie dót sem verið var að spyrja um í kómentum síðustu færslu. Ég erörugglega búinn að missa helminginn af lesendum mínum því hér hefur bara verið skrifað um glænýja tónlist sl. daga. Á móti kemur þó að hinn helmingurinn er þokkalega sáttur, býst ég við. Þetta kemur í bylgjum einsog annað.

Af mér er það annars að frétta að á þriðjudaginn held ég til Bergen fyrir hönd alþjóðanefndar SHÍ. Þar fer fram aðalfundur ESIB, sem eru samtök stúdenta í Evrópu. Samtökin snúast um að standa sameiginlegan vörð um hagsmuni stúdenta í Evrópu, t.d. þegar kemur að skólagjöldum eða annarskonar lagasetningu, og líka á þann veg að nám sé fullkomlega gjaldgengt milli ríkja og milli háskóla o.s.frv. Þar dvel ég fram á þriðjudaginn næsta og byrja síðan að vinna. Sumarið er augljóslega hafið.

Plötur
Junior Boys: Last Exit
The Futureheads: The Futureheads
Ýmsir: Pop à Paris
The Thrills: So Much for the City

:: Atli 02:04 [+] :: ::
...

Orri Tómasson sagði:

Sjálfur fatta ég ekki hvað er málið með þessa Franz Ferdinand eða Arcade Fire (og allar hinar týpísku 2003-2005 hljómsveitirnar). Jú jú, þetta er alveg áheyrileg, vönduð og grípandi tónlist sem er fín í bílin eða party en tónlistin nær engu að síður engan vegin að grípa mig ein og sér sem slík.

Þetta er áhugavert kóment. Áhugavert því ég er ósammála því. Aðdáun mín á Franz Ferdinand er geysimikil, og það sésta t.a.m. á því að ég taldi samnefnda plötu þeirra bestu plötu síðasta árs (og tel enn) og sjöundu bestu plötu sl. fimm ára. Ástæðan fyrir því er sú að lögin eru öll gífurlega vel samin, óheyrilega grípandi, og útsetningarnar eru innilega módern og fullar af stuði, rokki og róli. Ég er ennþá að hlusta á Franz Ferdinand plötuna og í hvert skipti fyllist ég undrun yfir því hversu góð hún sé í raun og veru. Arcade Fire er af nokkuð öðrum meiði, ekki svona mikið partí, meira drama þar á ferðinni, og sem slík er hún frábær. Þegar ég tók saman minn árslista hafði ég ekkert hlustað á Funeral en ég keypti hana í NY og er á því að hún sé frábær, og þá sérstaklega lagið „Crown of Love“. Sándið á þeirri plötu er ótrúlega flott, þrátt fyrir strengi og rokkgrúppu eru lögin öll „rúmgóð“. Ég er búinn að standa mig ótrúlega oft að því að spila þessa plötu og ég hugsa að þannig verði það áfram næstu mánuði.

Stóra spurningin er því, hvaða samtímatónlist höfðar til Orra Tómassonar? Hvaða samtímatónlist höfðar til lesenda keipdúnsksins? Að mínu mati eru síðustu fjögur til fimm ár einhver bestu ár rokktónlistarinnar því böndin hafa einhverja sál, eitthvað vibe, sem er svipað og það sem heyra má í rokktónlist frá lokum sjöunda áratugarins og upphafi þess áttunda. Margir virðast ekki þola þessa nýju nýbylgju, nýskúrsrokkið, þ.e. þá bylgju sveita sem fylgdi í kjölfar Strokes, en oft af óljósum ástæðum, sérstaklega í ljósi þess að sú grein var mjög fljót að breiða úr sér og skóp dansrokk Rapture, svartsýnisrokk Interpol, fullkomið popp Franz Ferdinand, tilraunapopp Unicorns, og tilfinningarokk Arcade Fire. Það sem helst sem bindur þessar sveitir saman er tími og svo áferð á upptökum, en hrátt sánd er mikið inn núna, jafnvel þó það sé mjög fíníserað sbr. Libertines.

Þetta er illa skrifaður pistill en hann ýjar að því sem ég á við - að „allar hinar týpísku 2003-2005 hljómsveitirnar“ (2001-2005) séu drullugóðar. Ég meina, er í alvörunni einhver sem fílar ekki Bloc Party?

:: Atli 19:06 [+] :: ::
...

Af nýafstaðinni könnun er ljóst að meirihluti lesenda keipdúnksins telur að Toffypops sé besta kexið á markaðnum, en 26% lesenda töldu það best. Strax á hæla þess er þó Hob Nobs með 25%. Ég verð að segja að það eru þau úrslit sem koma mér mest á óvart, ég hafði ekki hugmynd um að Hob Nobs nyti svona mikilla vinsælda. Sjálfur kaus ég Oreo, og voru 10% ykkar á sama máli og ég. En í annað sætið hefði ég sett Krem kex frá Frón. Þar er ég greinilega nokkuð einn á báti, því ekki nema 5% keipdúnkara töldu það best, og var það þar með sú kextegund sem naut minnst fylgis. (Flokkurinn 'annað' naut 3%.) Þriðja vinsælasta kexið var Maryland með 19%, Snapjacks hlaut 7%, en það verður að teljast nokkuð óvænt að Homeblest fái ekki nema 6% fylgi. Ég hefði að óreyndu talið að Homeblest yrði efst eða næstefst sökum einfaldleika síns. Alls greiddu 132 atkvæði.

Ég gerði aldrei upp könnunina um árið 2004 og ætla því að nýta tækifærið. Sú könnun var á síðunni í fjóra mánuði og alls greiddu 309 einstaklingar atkvæði. Niðurstaðan varð sú að árið 2004 var „illa feitt“ að mati þriðjungs lesenda. Tæpur fjórðungur taldi það „stórkostlegt“ en rúmur fjórðungur sagði að það hefði verið „í meðallagi“. Þá erum við kominn langleiðina (1/3 + 1/4 + 1/4 = 5/6), en 12% voru á því að árið hefði verið „fremur grannt“. Leiðinlegast þykir mér þó að alls 6%, eða 17 einstaklingar, hafi verið á því að 2004 hafi verið „leiðinlegasta ár ever“.

Ný könnun snýst um að kanna hversu heitir keipdúnkarar eru fyrir fyrirhuguðum tónleikum Franz Ferdinand í Kaplakrika 27. maí nk.

:: Atli 13:41 [+] :: ::
...

Ég var að renna aðeins aftur yfir Pitchfork-listann yfir 100 bestu plötur síðustu fimm ára (2000 - 2004). Það vekur athygli mína að fimm af tíu efstu eru frá árinu 2000. Raunar eru fimm af sjö efstu frá árinu 2000, þ.m.t. toppplatan Kid A. Ég er að velta því fyrir mér hvort hér sé á ferðinni dæmi um að fjarlægðin geri fjöllin blá, eða hvort það ár hafi á einhvern hátt verið betri en önnur. Mér finnst nefnilega að sú tónlistarbylting sem nú er að ganga yfir, og jafnast á við þá sem gekk yfir á árunum eftir 1965, hafi ekki hafist fyrr en árið 2001 með nýbílskúrsrokkinu. Bara svona að spá.

Og í öðru lagi, er hallærislegt að birta einkunnir á blogginu sínu?

Og i þriðja, Blowboys sampl-samkeppnin stendur enn yfir. Þið getið sótt höfundarverkið hér og reynt að bera kennsl á öll níu sömplin (sjö trommulúpur og tveir effektar).

Plötur
Madlib: Shades of Blue (Madlib Invades Blue Note)
Architecture in Helsinki: In Case We Die

:: Atli 21:50 [+] :: ::
...

Ég þakka öllum hlýhug á afmælisdaginn, og einnig þeim sem gleymdu sér fram á daginn í dag og jafnvel eitthvað lengur. Dagurinn var einsog ég spáði: afar rólegur. Ég fór í klippingu og lét stytta hárið umtalsvert, svo Jón ætti að geta drifið sig núna. Ég gluggaði í Sögu tímans eftir Stephen Hawking, hlustaði á Song Cycle með Van Dyke Parks og Endless Summer með Fennesz. Dottaði eilítið, fór síðan út að borða með familíunni og Svölu á Horninu. Ljúffeng pizza og eitt ísblóm á Ís Café á heimleiðinni, svona til að toppa þetta. Orri kíkti á mig, og eftir stutta viðdvöl í Hafnarfirði lagðist ég til svefns hér í Bjarmalandinu.

Ég og Leó reyndum síðan að komast yfir ólöglegar útgáfur af Logic Audio, Cubase og Digital Performer í dag, en ekkert gekk. Ef einhver getur plöggað mér þessum forritum fyrir Makka, helst því fyrstnefnda eða því síðastnefnda, þá væri það vel þegið.

Það er fínt að vera í fríi og ég er ánægður með að vita ekki hvað morgundagurinn ber í skauti sér. Ef ykkur vantar ævintýri er ég allltaf til.

:: Atli 20:53 [+] :: ::
...

TVÍTUGUR

Í gærkvöldi setti ég punkt aftan við lokaritgerð í lokanámskeiði þessa misseris. Það merkir það að ég er kominn í sumarfrí; ég er búinn að ljúka einu ári í bókmenntafræði við Háskóla Íslands, eða verð það allavega þegar ég fæ einkunnirnar í hendur. Þetta hittist rosalega skemmtilega á, því auk þess að vera búinn í prófum þá á ég afmæli í dag, dett í tvítugt. Ég skal játa að þetta verða engin stórkostleg viðbrigði fyrir mig, mér hefur raunar þótt ég vera tvítugur í nokkur ár. Einungis í undantekningartilfellum hefur mér verið meinaður aðgangur að skemmtistöðum, að börum og að afgreiðsluborði ÁTVR. Þetta er þó fýsískur munur, ég get t.d. gert ráð fyrir því að fjórðungi lífs míns sé lokið.

Mig langar til þess að halda alveg ógeðslega stórt partí í tilefni af afmælinu þar sem ég býð öllum sem ég þekki. Þetta yrði meira en 150 manna partí og myndi standa heila nótt. Af því verður þó líklega ekki fyrr en eftir að háskólanemar og framhaldsskólanemar hafa lokið prófum. Dagsetningarnar sem ég hef í huga eru 20. maí eða helgin 3. - 4. júní. Mér hefur borist það til eyrna að mjög margir ætli að halda upp á sambærileg afmæli 20. maí, og mér þætti vænt um að lesendur keipdúnksins létu mig vita ef þeir hafa haft spurnir af slíku.

Daginn ætla ég að taka rólega. Ég var að panta mér klippingu klukkan hálftvö, ég þarf aðeins að kíkja í banka, væri til í að fara eitthvað út að borða í kvöld. Það þarf náttúrulega ekki að taka það fram að ég er opinn fyrir heimsóknum í allan dag. Raunar hvet ég ykkur til að kíkja á mig. Þið væruð vissust um að hitta á mig einhverntímann í kvöld. Hringið bara ef þið eruð í vafa: 847 9290.

:: Atli 11:21 [+] :: ::
...