:: keipdúnkur atla bollasonar ::

:: föstudagur, febrúar 24, 2006 ::

Þar sem það er svona nett dauður tími hjá mér núna er ég að pæla í að taka áskorun systur minnar og svara eftirfarandi spurningum (klukk er þetta víst kallað):

4 störf sem ég hef unnnið við:

o Pikkoló og síðar porter og enn síðar næturvörður á Hótel Sögu, árin 2000-2003.
o Atvinnulaus/ræstitæknir hjá ISS Danmörku sumarið 2003.
o Leiðbeinandi hjá Jafningjafræðslu ÍTR sumarið 2004.
o Verslunarstjóri í Grapevine INFO sumarið 2005.

4 bíómyndir sem ég gæti (og hef) horft á aftur og aftur:

o The Big Lebowski
o Magnolia
o Mulholland Drive
o The Wedding Singer

4 plötur sem ég gæti ekki verið án:

o The Strokes: Is This It
o King Crimson: In the Court of the Crimson King
o Squarepusher: Hard Normal Daddy
o Belle & Sebastian: The Boy With the Arab Strap

4 staðir sem ég hef búið á:

o Richardson Road 781, Rochester, New York, USA
o Neshagi 12, Reykjavík, Ísland
o Bjarmaland 4, Reykjavík, Ísland
o Þórsgata 17a, Reykjavík, Ísland

4 sjónvarpsþættir sem mér líkar:

o Seinfeld
o Monty Python
o The Simpsons
o The X-Files

4 síður sem ég skoða (nær) daglega fyrir utan blogg:

o pitchforkmedia.com
o gmail.com
o hi.is
o rjominn.is

4 bækur sem mér þykja ljómandi góðar:

o Sjálfstætt fólk e. Halldór Laxness.
o The Catcher in the Rye e. J.D. Salinger.
o Sexing the Cherry e. Jeanette Winterson.
o Austerlitz e. W.G. Sebald.

4 staðir sem ég hef heimsótt í fríum:

o Frakkland, þ.e. Reims, París, og tveir smábæir sem ég man ekki hvað heita. Í smábæjunum var ég með fjölskyldu minni og fleirum, en við höfðum leigt okkur hús þar sem við dvöldum í góðu yfirlæti og afslöppun.
o Bandaríkin, Rochester, New York, Iowa, Seattle, Chicago, Minneapolis. Ég hef búið þar, en ferð mín til New York var kannski næst því að vera hefðbundið frí. Það var líka ótrúleg upplifun, New York-borg er engu lík og líklegast svalasti staður á jarðríki.
o Þýskaland, München. Þangað hef ég farið með fjölskyldu minni fyrir þrettán árum síðan, en eftirminnilegra var ferðalag með vinum mínum árið 2001. Enn er verið að segja sögur þaðan.
o Danmörk, Kaupmannahöfn o.fl. Hef komið þangað þrisvar sinnum, einusinni með fjölskyldunni, einusinni til að heimsækja Svölu meðan hún dvaldi þar og síðan bjó ég þar sumarlangt á Jægerborgsgade. Ótrúlegt sumar.

4 matarkyns sem ég held uppá:

o Kochini's pítsa.
o Kebab, keyptur í Nørrebro.
o Saltfiskur, stappaður með kartöflum og smjöri.
o Haganlega matreidd steik.

4 staðir sem ég vildi heldur vera á núna (ég leyfi mér að teygja bæði tíma og rúm):

o Í New York.
o Á stóra sviðinu á Benicassim-hátíðinni.
o Í sturtu.
o Annars líður mér bara ágætlega einsog er.

Ég hlífi ykkur öllum við því að klukka einhvern annan.

Í ákveðnum liðum hefði mér þótt gaman að geta nefnt fleiri en fjóra hluti, en í öðrum var ég í mestu vandræðum með að fylla kvótann. Ætli eitthvað hafi komið keipdúnkurum á óvart?

:: Atli 18:38 [+] :: ::
...

Nortón-upptökur eru komnar á gott skrið á ný eftir annríki síðastliðinna vikna. Við erum nær alveg búnir með básúnu og slagverk, sem þýðir að eftir er Rhodes, gítar og söngur. Við ættum að geta klárað allt nema sönginn um helgina. Hann er ögn erfiðari þar sem við erum ekkert frábærir söngvarar. Með aðstoð góðra manna og stemmningarinnar ætti það þó að hafast. Ég stefni í það minnsta á útgáfu í byrjun maí. Þetta verða tíu til ellefu lög og ég er bara nokkuð spenntur.

Plötur
Islands: Return to the Sea
Belle & Sebastian: The Life Pursuit
King Crimson: Red
Edan: Beauty and the Beat

:: Atli 17:49 [+] :: ::
...

Silvía er fyndnust („Sigga Beintenis, skiluru!“), Bjartmar er í flottustu peysunni, en Dísella á vafalaust besta lagið. Óumdeilanlegt.

Plötur
Megas & Spilverk þjóðanna: Á bleikum náttkjólum
Belle & Sebastian: The Life Pursuit
Trúbrot: Brot af því besta

:: Atli 21:28 [+] :: ::
...

Vorinu blés víst í burt með vindinum sem sigraði nóttina eftir síðustu færslu. Jæja.

Lauk við The Light of Day eftir Graham Swift í gærdag. Skemmtileg bók, ekki síst fyrir þær sakir að hún notar með meðvituðum hætti ýmsar leynilögreglusöguklisjur, t.a.m. er aðalpersónan einkaspæjari sem á sér rómantíska/erótíska fortíð með einkaritaranum en er nú ástfanginn af einum kúnnanum, konu sem réð hann til að elta eiginmann sinn á flugvöllinn þar sem hann kvaddi viðhaldið...

Allavega, þessi saga fékk mig (og fleiri) til þess að pæla í þessu fyrirbæri: einkaspæjarar. Eru til einkaspæjarar á Íslandi? Ég fletti starfsheitinu upp á ja.is og fékk enga niðurstöðu. Ég hélt í gulu síðurnar, fetaði mig eftir þeim niður nokkrar slóðir, en allt kom fyrir ekki - ég fann ekkert starfsheiti sem var í þá áttina. Og þá vaknaði önnur spurning. Er starf einkaspæjara löglegt? Það er kannski allt í lagi að elta fólk og eitthvað (eða hvað? Mér finnst það á mjöööög gráu svæði), en að taka myndir inn um gluggann hjá fólki, til dæmis? Slíkar myndir eru ábyggilega oft efniviður í fjárkúgun, og þá hlýtur einkaspæjarinn að vera samsekur, ekki satt? Gat ég ekki fundið einkaspæjara í símaskránni vegna þess að þeir starfa undir dulnefnum, í skjóli nætur, einsog vændiskonur og eiturlyfjasalar? En... öfugsnúið.

Nú er það þekkt staðreynd að einkaspæjarar starfa í hinum stóra heimi, sérstaklega í Bandaríkjunum. Kennarinn minn benti mér á að það er m.a. vegna þess að í því afskaplega frjálsa landa er fólki ekki gert að skrá sig, hafa lögheimili o.s.frv. þannig að það getur oft verið meiri háttar mál að hafa uppá fólki. Er athæfi þeirra löglegt þar? Er löglegt að fletta ofan af framhjáhaldi með eftirför og ljósmyndum?

:: Atli 12:48 [+] :: ::
...

Fór í strætó í dag. Þeir eru farnir að gefa út nýja tegund af skiptimiðum, eða farmiðum einsog þeir heita víst núna. Annars tók ég eftir því að karlmenn áttu mjög undir högg að sækja í strætónum, voru ekki nema 15-20% farþega. Ætli það tengist því hvernig drengjum eru gefnir leikfangabílar?

Sólin skein fagurlega í gegnum strætórúðuna, alveg einsog hún hafði skinið inn til mín á Þórsgötuna nokkrum klukkustundum fyrr. Það mætti halda að vorið sé að koma, þetta er í það minnsta á par við aprílveður þótt kaldara sé. Maður er sáttur við lífið þegar maður situr í sófa og gluggar í bók, jafnvel þó að bókin sé strangt til tekið námsefni, þegar maður er ekki nema tvær mínútur að rölta út í búð og kaupa sér dýrindis rúnstykki.

Ég hef kúvenst í afstöðu minni til frítíma sl. ár. Fyrir ekki svo löngu mat ég frítíma ofar öllu, gat ekki beðið eftir því að ljúka fyrirliggjandi verkefnum svo ég gæti farið að gera... ekki neitt. Nú er hver mínúta dagsins iðulega þéttskipuð hjá mér og mér dettur ekki í hug að kvarta. Maður verður bara að reyna að velja sér skemmtileg verkefni.

Ég hef líka kúvenst í afstöðu minni til fólks. Einusinni þoldi ég ekki fólk til að byrja með og leyfði því síðan að vinna sig upp. Núna trúi ég á fólkið og gef mér að það sé frábært alveg þar til annað kemur í ljós. Saklaus uns sekt er sönnuð. Þetta hefur haft það í för með sér að ég kann vel við nær alla, í svipinn man ég ekki eftir neinum sem ég þoli ekki eða „hata“.

Fyrir þá sem ekki vita fóru kosningarnar til SHÍ á sama veg og í fyrra, þ.e. fjórir fjórir einn, jafnt hlutfall stúdentaráðsliða frá Röskvu og frá Vöku og Háskólalistinn í oddastöðu. Samningaviðræður standa nú yfir.

Ég er að hjálpa lítillega til við Morfís-undirbúning uppí MH, en Kári, Dóri, Atli og rauðhærði frummælandinn Sjonni munu mæta Flensborg á föstudaginn og mæla á móti sársauka. (Finnst ykkur þetta ekki fríkað?)

Högni hélt vel heppnað partí á laugardaginn, það hófst með mat og vínkynningum og leiddi þaðan í stærra og sveittara teiti. Alltaf gaman í partíum á Vífilsgötunni, þau eru á einhvern hátt óheflaðri en aðrar veislur, standa oft lengur og gestafjöldinn er gjarnan meiri en maður á að venjast. Þótt ég hafi skemmt mér gríðarvel þá neyddist ég til þess að fórna afmælisveislum Sunnu og Jóhanns Alfreðs, en það fannst mér afskaplega leiðinlegt. Til hamingju með afmælið bæði tvö.

Plötur
Apostles of Hustle: Folkloric Feel
Stafrænn Hákon: Ventill/Poki
Hard-Fi: Stars of CCTV
Arctic Monkeys: Whatever bla bla bla

:: Atli 18:08 [+] :: ::
...

Karl Þorbergsson, tvífari Sverris bróður míns og ótrúlega frábær fyrrum bókmenntafræðinemi/núverandi leikhúsfræðinemi (eða leikhús: fræði og framkvæmd), á heiðurinn af því að hafa verið númer 111.111. Til hamingju Kalli. Í verðlaun færðu það að ég skal skila þér Heddu Gabler sem ég er búinn að vera með í láni í ár.

Ekki gleyma að kjósa.

:: Atli 23:14 [+] :: ::
...

Í dag hefjast kosningarnar til Stúdentaráðs Háskóla Íslands. Þeir sem hafa lesið þetta blogg upp á síðkastið vita að ég er í framboði fyrir hönd Röskvu. Ég er þess algjörlega sannfærður að Röskva sé eina fylkingin sem geti náð árangri í hagmsunabaráttu stúdenta, enda eina fylkingin sem þorir að líta aðeins út fyrir eigin nafla og skoða hagsmuni stúdenta í víðu samhengi. Vökumenn hafa snúið mjög útúr þessari skoðun okkar og talað um að Röskva ætli sér að álykta um Íraksstríðið, virkjanamál og framboð Íslands til öryggisráðs Sameinuðu Þjóðanna. Þetta eru útúrsnúningar - það eina sem við eigum við er að fjöldi lagafrumvarpa, og ýmis umræða sem á sér stað í þjóðfélaginu, snýst kannski ekki um stúdenta eða háskólann en getur engu að síður haft mikil áhrif á réttindi okkar. Hér má nefna lög um fæðingarorlof sem voru endurskoðuð í lok ársins 2004. Breytingarnar höfðu það í för með sér að nýútskrifaðir stúdentar og stúdentar í námi erlendis fá ekki greitt sem skyldi úr fæðingarorlofssjóði. Stúdentaráð Vöku sem var við völd 2004-2005 hafði ekki vit á því að skoða þessi lög, vegna þess að Vaka vill forðast pólitísk afskipti. Það er þetta sem við eigum við með pólitísk afskipti.

Við í Röskvu vitum að öll litlu, sætu málin sem er að finna í málefnaskrá Vöku (og Röskvu, að einhverju leyti) stranda á því að Háskólinn er ein fjársveltasta ríkisstofnun í Evrópu. Auk þess býr Háskólinn við afskaplega ójafnt samkeppnisumhverfi, sem dæmi má nefna að enskunemar við HR fá meira greitt heldur en enskunemar við HÍ. Stúdentaráð Vöku hefur ekki vakið athygli á þessum hlutum, heldur verið ósýnilegt og fremur reynt að gera það besta úr vonlausri stöðunni. Röskva sættir sig ekki við óbreytt ástand. Pólitískur þrýstingur virkar, dæmi úr Íslandssögunni og erlendis frá eru til vitnis um það. Við ætlum ekki að hjálpa ríkisstjórninni við að vanrækja lagalega skyldu sína, sem er að borga með hverjum nemenda við HÍ. Við gefumst ekki upp.

Í þriðja lagi er Röskva eina fylkingin sem hafnar skólagjöldum með öllu. Við höfnum þeim á öllum námsstigum og innan okkar raða er enginn tengdur félagasamtökum sem styðja upptöku slíkra gjalda. Því miður gildir ekki hið sama um Háskólalistann og Vöku; 1. sætið hjá fyrrnefndu fylkingunni er stoltur af því að vera í SUS og á lista þeirra síðarnefndu er framkvæmdastjóri SUS, málefnastýra SUS o.fl. Fólk má vera í hvaða stjórnmálahreyfingu sem það vill, en mér finnst skjóta skökku við að segjast vera á móti skólagjöldum en styðja samtök sem samþykktu eftirfarandi ályktun í október á síðasta ári:

Ungir sjálfstæðismenn telja vert að háskólastúdentar greiði sjálfir fyrir nám sitt að öllu eða verulegu leyti. Skoða ber kosti þess að einkareka Háskóla Íslands. SUS telur opinbera styrki til menntamála ekki eiga rétt á sér og vilja afnema þá með öllu.

Ég hugsa að ég hafi þau orð ekki fleiri. Ég hvet alla háskólanema bara til þess að mæta á kjörstað, það er gríðarlega mikilvægt að SHÍ hafi sterkt umboð. Einungis þannig getum við haldið baráttunni áfram. Aðeins þannig getum við náð árangri.

:: Atli 12:39 [+] :: ::
...

Og hver ætli verði númer 111.111? (Sjá neðst á síðu).

:: Atli 17:46 [+] :: ::
...

DV-málið

Einsog margoft hefur komið fram á þessu bloggi þá er það afstaðan til pólitíkur og pólitískra mála sem skilur Röskvu og Vöku einna helst að. Vaka vill ekki að SHÍ hafi skoðun á þvi sem á sér stað utan veggja Háskólans. Engu að síður vildi Vaka að SHÍ hefði skoðun á ritstjórnarstefnu DV fyrir nokkrum vikum síðan. Raunar lagði Vaka það til að ályktunin næði ekki bara til stúdenta heldur til ,,landsmanna allra".

Ég get ekki séð að ritstjórnarstefna DV snerti stúdenta með neinum hætti, hvorki beinum né óbeinum og sjálfum finnst mér ekki eðlilegt að SHÍ fjalli um þetta mál.

Hvar dregur Vaka mörkin? Hefði Vaka tekið afstöðu ef einhver annar en deiglan.com hefði staðið fyrir undirskriftasöfnuninni? Þetta eru brýnar spurningar sem setja Vöku í erfiða aðstöðu: hvernig getur þetta samræmst ,,framkvæmdaafl - ekki pólitískur þrýstihópur" stefnunni?

Hér ber einnig að minna á að þótt Röskva vilji að SHÍ sé pólitískt þrýstiafl þá þýðir það ekki að við eigum að álykta um stríðið í Írak eða stóriðju. Það þýðir heldur ekki að við viljum að SHÍ sé ekki framkvæmdaafl. Að sjálfsögðu getur SHÍ verið hvoru tveggja.

:: Atli 19:41 [+] :: ::
...

Ekki gleyma svitaballi Röskvu í kvöld, á sveittasta stað bæjarins: Kaffi Amsterdam, klukkan 22:00. Stór bjór á 350 svarta kettlinga. DJ AMABA (DJ AMMA og DJ BABAR) halda uppi stuðinu ásamt hljómsveitinni Vax. Ef þið mætið ekki þá mun mannorð ykkar aldrei bíða þess bætur...

...djók.

E.S. Árni Helgason segist ekki hafa verið viðstaddur landsþing Sjálfstæðisflokksins. Hann á því inni afsökunarbeiðni hjá mér.

:: Atli 16:36 [+] :: ::
...

Rjóminn heldur áfram að sópa að sér... tilnefningum... Hjálpið okkur að vinna verðlaun sem besti tónlistarvefur landsins hjá XFM með því að smella hér.

:: Atli 16:14 [+] :: ::
...

Nokkur atriði

Mig langar til þess að skýra nokkur atriði sem eru kannski eilítið óljós, bæta nokkrum punktum við og svara einhverjum kómentum.

I.
Nafnlaus ritar (mér finnst nú lágmark að koma fram undir nafni, en Nafnlaus biðst í það minnsta afsökunar á því að skrifa ekki undir nafni og fær því kredit frá mér):

Ég spyr þig Atli, hversu víðtækt ályktunarvald telur þú að SHÍ eigi að hafa? Hafið þið í Röskvu dregið einhverjar línur sem þið ætlið að fylgja? Þetta eru ekki aðdróttanir þetta er einungis eðlislæg forvitni.
Skólann skipa 9000 manns úr öllu litrófi samfélagsins. Á meðal okkar eru feður og mæður, útlendingar, samkynhneigðir, gamalt fólk, ungt fólk, ríkt fók, fátækt fólk og þar fram eftir götum. Við höfum ólíkan bakgrunn, ólíkar skoðanir og oft á tíðum skilja okkur að himinn og haf.
Við eigum það þó sameiginlegt að sækja okkur menntun við HÍ. Við erum öll nemendur, og sem slíkir þá njótum við ákveðinna réttinda. Réttinda sem við sækjum til skólans og yfirvalda. Til þess að gæta þessara réttinda kjósum við okkur fulltrúa, embætti sem þið sækist svo eftir að gegna. Þó svo að svigrúm ykkar sé nokkuð og við treystum dómgreind ykkar, þá er ykkur ekki veitt umboð til að fara fyrir skoðunum háskólanema sem lúta ekki að réttindum þeirra eða skyldum, sem nemum við HÍ. Líkt og forsetum framhaldsskóla er ekki heimilt að gera nemendum sínum upp skoðanir, hvað varðar ættleiðingar, ríkisborgararétt o.s.frv. eða forsvarsmönnum íþróttafélaga er ekki í sjáflsvald sett að tjá sig um flugvöllinn í Vatnsmýrinni fyrir hönd allra Breiðabliksmanna eða KA manna.

Ég get ekki betur séð en við séum á sama máli. Það verður að vera alveg skýrt að Röskva sér ekki fyrir sér að SHÍ hafi skoðun á innrásinni í Írak, svo dæmi sé tekið. Við viljum einungis að hagsmunir stúdenta séu skoðaðir í víðari skilningi og hugað að áhrifum tiltekins frumvarps, umræðu eða hugmyndar á stúdenta.

Breiðablik og KA hafa engra hagsmuna að gæta í Vatnsmýri, en það hefur Háskóli Íslands hinsvegar. Þar er byggingarland skólans og stúdenta til framtíðar og þess vegna er mjög eðlilegt að SHÍ hafi skoðun á því hvað verði um þetta landsvæði.

Ég geng til kosninga þann 8. febrúar og merki við þann sem er reiðubúinn að standa vörð um tiltekna, afmarkaða hagsmuni mína. Ég er ekki að leggja blessun yfir neina stjórnmálalega stefnu og allra síst er ég að kjósa mér málsvara í þjóðfélagsumræðunni. Það geri ég ekki í stúdentakosningum heldur í kosningum til Alþingis. Þú hamrar á stjórnmálalegum tengslum Vöku, og leggur nánast fæð á slíkt. En þess á milli virðist þú vera leggja grunn að nýjum flokki í landspólitíkinni, þar sem 9000 manna bakland þitt tryggir þér málsrétt. 3000, 9000 eða 50.000 manns breyta engu um valdsvið SHÍ.

Ef þú vilt afl sem er reiðubúið til þess að verja raunverulega hagsmuni þína, hagsmuni sem snúa að skólagjöldum, sem snúa að lánasjóðsmálum, sem snúa að réttindum, sem snúa að fjármagni HÍ - þá er Röskva rétti kosturinn. SHÍ á ekki að hafa neina stjórnmálalega stefnu aðra en þá að alla hluti þurfi að skoða í samhengi við stúdenta og Háskóla Íslands. Sem betur fer er stúdentasamfélagið ekki eyland í þjóðfélaginu, það tengist ýmsum öðrum þáttum og kimum þess. Þessa kima verður líka að skoða.

Ég vil ekki að SHÍ sé nýr flokkur í landspólitíkinni, ég vil bara að SHÍ þori að taka afstöðu með eða gegn stjórnvöldum í málum sem snerta stúdenta með beinum eða óbeinum hætti.

Þó svo að þið talið fyrir hönd nemenda innan veggja HÍ, þá hafið þið ekkert umboð fyrir utan þessa veggi. Ég geri mér grein fyrir því að það er freistandi að nota fjöldann sem afsökun til að auka vægi orða SHÍ, en takið ykkur ekki valdið, því eins og sagt hefur verið, vald spillir. Sækið rétt vald á réttum vettvangi. Því áður en þið vitið af verðið þið farin að álykta og þrasa um hverfisskipulagið í vesturbænum, af því að jú, það búa x margir háskólanemar í vesturbænum.

Við sækjum okkar vald til stúdenta vegna þess að þeir hafa treyst okkur fyrir að huga að þeirra málum. Við viljum tala fyrir hönd nemenda innan veggja HÍ, m.a. á þeim vettvangi sem liggur utan háskólans. Ákvarðanir sem eru teknar á Alþingi hafa áhrif á nám okkar og réttindi og þess vegna er sjálfsagt að SHÍ fjalli um þau mál. Gleymum því ekki að skólagjöld eru t.d. hápólitískt mál og fjöldi nemenda við HÍ er fylgjandi upptöku slíkra gjalda.
Varðandi hverfisskipulagið í Vesturbænum, þá má vel hugsa sér að SHÍ taki einhverja afstöðu i þeim efnum, t.d. hvað varðar bættar hjólasamgöngur eða greiðara aðgengi að byggingum Háskólans, Hagi stendur jú við Hofsvallagötu og byggingarnar sem eru vestan Suðurgötu teljast til Vesturbæjarins.

Í stuttu máli, ég held að við Nafnlaus séum nokkuð sammála; ég vil að öll þjóðfélagsmál séu skoðuð í samhengi Háskólans og stúdenta. Þannig getum við í sameiningu stuðlað að betri Háskóla.

Annars virðist Vaka vera að draga aðeins í land með að SHÍ skuli ekki vera pólitískur þrýstihópur. Þau virðast hafa áttað sig á því að slík samtök eru gagnslaus og rita því:

Ráðið má þó ekki hika við að nýta þann þrýsting sem tíu þúsund stúdentar geta myndað ef þeir eru sameinaðir, í pólitískum málum sem varða stúdenta beint.

Vatnsmýrin varðar stúdenta að sjálfsögðu ekki beint, neinei...

II.
Varðandi SUS-málið. Ég hef ekkert út á það að setja að Vökuliðar starfi með SUS. Það sem slíkt er lítið mál, einsog fram hefur komið starfa nokkrir Röskvuliðar með ungliðahreyfingum stjórnmálaflokkanna. Það sem ég er að setja út á er það að Vökuliðar séu á móti skólagjöldum á einum vettvangi, en fylgjandi þeim á öðrum. Það kalla ég hræsni og slíkt finnst mér ekki eiga erindi inn í SHÍ.

III.
Enn skýrist munurinn á Röskvu og Vöku. Í málefnaskrá Vöku má finna eftirfarandi klausu:

Ein sú grundvallarhugarfarsbreyting sem sjá mætti verða sem fyrst, er að farið verði að líta á Háskólann sem þjónustustofnun og nemendur sem viðskiptavini

Þessu er ég algjörlega ósammála. Menntun er ekki vara, og hana má ekki ræða sem slíka. Vörur getur maður keypt (t.d. með skólagjöldum). Menntun er ferli, þroskandi ferli sem verður ekki metið til fjár.

Hér má benda á það að ESIB - samtök stúdenta í Evrópu starfrækja sérstaka nefnd (Committee on the Commodification of Education) sem miðar að því að útrýma öllum hugmyndum og orðalagi sem fjalla um menntun sem vöru (commodity).

IV.
Í viðtali í Vökublaðinu við Sunnu Kristínu, annað sætið á Vökulistanum, segir hún:

Ef ráðið færi á annað borð út í að álykta um hin ýmsustu þjóðmál og túlka vilja stúdenta er erfitt að átta sig á hvar draga ætti mörkin. Miklu eðlilegra er að þeir aðilar sem finna mikla þörf fyrir að tjá sig um þjóðmálin geri það á öðrum vettvangi, heldur en í nafni stúdenta.

Um sama mál segir Þórður Gunnarsson (aka Doddi)í sama blaði:

Ef ráðið færi á annað borð út í að álykta um hin ýmsustu þjóðmál og túlka vilja stúdenta er erfitt að átta sig á hvar draga ætti mörkin. Miklu eðlilegra er að þeir aðilar sem finna mikla þörf fyrir að tjá sig um þjóðmálin geri það á öðrum vettvangi, heldur en í nafni stúdenta.

Traustvekjandi blaðamennska, ekki satt?

Plata
Mr. Schmuck's Farm: Good Sound

:: Atli 15:33 [+] :: ::
...