:: keipdúnkur atla bollasonar ::

:: fimmtudagur, janúar 31, 2008 ::

Mér finnst mjög spaugilegt að dæmdur morðingi og annar sem var viðriðinn líkfundarmálið á Neskaupsstað hafi stofnað fyrirtæki sem stendur meðal annars i innheimtu, og að enn annar fangi sem var dæmdur í fangelsi fyrir stórfellt fíkniiefnasmygl standi að fyrirtæki sem selur gróður- og efnavörur. Satt best að segja er forsíðufrétt 24 stunda eins og brandari séð með þessum augum.

Plötur
Vampire Weekend: s/t
Liars: s/t
God Save the Clientele

:: Atli 17:43 [+] :: ::
...

Nokkur innantóm orð eins og lýðræði

Þeir voru merkilegir atburðirnir sem áttu sér stað í síðustu viku, 24. janúar. Það var merkilegt þegar hundruð manna mættu í Ráðhús Reykjavíkur til þess að lýsa yfir vanþóknun sinni á þeim vinnubrögðum sem voru viðhöfð við myndun nýs meirihluta í höfuðborginni, og til að lýsa vanþóknun sinni á því að oddviti flokks (sem kom svo í ljós að var enginn flokkur) með hverfandi atkvæðafjölda skyldi kjörinn borgarstjóri. Fólkið sem kom saman í Ráðhúsinu voru fulltrúar 75% borgarbúa – allra þeirra sem hugnaðist ekki að nýr meirihluti skyldi hafa verið myndaður utan um tóm orð og það sem virðist vera ólýsanleg valdagræðgi í þriðjaheimsstíl og gróf mistúlkun á tilgangi stjórnmálanna og borgarfulltrúa.

***

En það sem er næstum því merkilegra en atburðirnir í ráðhúsinu eru íhaldssöm viðbrögð blaðamanna, bloggara og annarra sem virðast löngu búnir að gleyma því til hvers lýðræðið er og hvers vegna þeir styðja eina stjórnmálahreyfingu og ekki aðra. Mótmælin voru ekki yfirstaðin áður en fólk var farið að grípa til orða á borð við „skrílræði“ og lífsþreyttar mæður farnar að gleðjast yfir því að „eiga ekki ungling á pöllunum.“ Það birtist meira að segja viðtal á vef Morgunblaðsins við stjórnmálafræðinginn Stefaníu Óskarsdóttur sem hefði mögulega átt að líta á sjónvarpsskjáinn eða drífa sig niður í Ráðhús áður en hún fór að tjá sig opinberlega um aldur, reynslu og fjölda mótmælenda, því allt sem hún lét hafa eftir var í hrópandi mótsögn við veruleikann. Ég var staddur í Ráðhúsi Reykjavíkur þetta hádegið og ég get fullvissað alla lesendur Stúdentablaðsins um að ég var með þeim yngstu sem ég hitti þar fyrir, og að fólkið á pöllunum var á öllum mögulegum aldri þótt vissulega hafi meirihlutinn verið undir þrítugu. Þeirri hlægilegu staðhæfingu að „álika margir ungliðar úr Sjálfstæðisflokknum“ hafi verið á áheyrendapöllunum nýjum meirihluta til stuðnings geta öll vitni svarað: Líklega hafa þeir verið rúmlega tuttugu talsins, meðan fjöldi mótmælenda hljóp án nokkurs vafa á hundruðum. Hvers vegna ætli enginn fréttamannanna sem var á staðnum hafi leiðrétt frú Stefaníu Óskarsdóttur, fyrrum varaþingmann Sjálfstæðisflokksins, þegar hún fór svo augljóslega með rangt mál?

***

Því hefur verið haldið nokkuð á lofti að mótmælin hafi verið skipulögð af ungliðahreyfingum þeirra flokka sem mynduðu „Tjarnarkvartettinn“ og fyrir vikið séu þau „ómarktæk.“ Sjálfur var ég ekki meðvitaður um að umræddar ungliðahreyfingar stæðu fyrir mótmælunum heldur túlkaði ég þær sem eðlilegt framhald undirskriftarsöfnunar sem hafði hafist nokkrum dögum fyrr gegn nýjum meirihluta og ekki síður sem afleiðingu þeirrar reiði og undrunar sem ég hafði fengið að kynnast í samtölum mínum við aðra borgarbúa. Og jafnvel þótt ég og meirihluti fólks hefði verið meðvitaður um hverjir skipuleggjendurnir voru (sem ég efast um), þá breytir það engu um málstaðinn eða afstöðu okkar. Það er engin skylda að vera í Samtökunum 78 til að mæta á Gay Pride. Við vorum þarna til þess að setja stórt og æpandi spurningamerki við aðfarir nýja meirihlutans og ekki þarf maður að vera flokksbundinn til þess. Enda er það alveg ljóst að ekki eru allir Sjálfstæðismenn í skýjunum yfir málefnasamningi D-lista og F-lista, né yfir nýja borgarstjóranum. Það nægir að horfa á upptöku af blaðamannafundinum á Kjarvalsstöðum og fylgjast náið með öðrum borgarfulltrúum Sjálfstæðismanna en oddvitanum til þess að sjá að ekki er einhugur um málið innan raða borgarfulltrúanna heldur.

***

Önnur röksemd sem hefur verið notuð gegn mótmælunum er sú að mótmælendur hafi verið ungir og æstir – og þá er í raun og veru átt við að þetta hafi bara verið hormónamettaðir menntskælingar. Það er að vísu ekki raunsönn lýsing á hópnum, en ef svo væri þá væru rökin engu að síður ósannfærandi. Helmingur menntaskólanema hefur kosningarétt, og síðast þegar ég gáði voru öll atkvæði jafnrétthá, jafnmikilvæg. Þetta vita borgarfulltrúarnir sjálfir fullvel, en greinilega bara á fjögurra ára fresti. Menntaskólanemar þurfa eins og aðrir kjósendur í aðdraganda kosninga að þola gylliboð og símhringingar - aðgangsharkan er jafnvel meiri eftir því sem kjósandinn er yngri, og stundum blöskrar manni hversu lágt frambjóðendur eru tilbúnir að leggjast til þess að ná góðri kosningu meðal kjósenda um og undir tvítugu. Þetta eru ekki ókeypis atkvæði, þetta er ekki fólk sem kýs af gömlum vana, og það er út í hött að þeim sé ekki sýnd tilhlýðileg virðing þegar allt kemur til alls. Eitt helsta umkvörtunarefni eldri kynslóðanna er skeytingarleysi unga fólksins og áhugaleysi þess, en þegar það lætur loks í sér heyra og eftir sér taka, þá ummyndast ungt fólk innan íhaldssamrar orðræðu í skríl. Því miður ræður sú orðræða ríkjum í fjölmiðlum hér á landi.

***

Það er réttur okkar að mótmæla. Þegar ritstjóri 24 stunda stingur upp á því að fólk skrifi greinar eða bloggi (!) í stað þess að láta í sér heyra á pöllunum afhjúpar hann hversu hann er úr takti við kjarnann í lýðræðinu. Kjörnir fulltrúar geta mjög auðveldlega hundsað slíkar aðgerðir, og raunar eru þeir þrautþjálfaðir í því þar sem þeir þurfa bara að standa skil á gjörðum sínum fjórða hvert ár. Besta dæmið var sama dag og mótmælin: Undirskriftum gegn nýjum meirihluta hafði verið safnað, fleiri en þeim atkvæðum sem Ólafur F. hefur á bak við sig, en enginn fulltrúi nýja meirihlutans mætti til að veita þeim viðtöku. En þegar þeir standa augliti til auglitis við fólkið sem þeir hafa svikið er erfiðara að líta undan. Þetta vissu stúdentarnir í París fyrir fjörutíu árum síðan, þetta vissu andstæðingar Víetnamstríðsins, og þetta vissi fólkið á pöllum Ráðhússins 24. janúar 2008. Tilefnið er kannski ekki jafnstórt, en tilfinningarnar eru alveg jafnsannar. Kjörnir fulltrúar mega ekki gera hvað sem þeir vilja milli kosninga. Þeir eru kosnir vegna þess að fólkið treystir þeim. Ef þeir bregðast því trausti er ekkert eðlilegra en að fólk láti vonbrigði sín og reiði í ljós svo eftir verði tekið. Ef að lýðurinn er orðinn lýðræðinu hættulegur er hugmyndin greinilega að hruni komin.

***

Heimdallur harmaði framferði þeirra sem létu óánægju sína í ljós þennan dag og kölluðu mótmælin „ótrúlega óvirðingu gagnvart [...] þeim almennu reglum sem gilda um lýðræðislega meðferð mála í þjóðfélaginu“ og sama dag fögnuðu þau endurkomu Sjálfstæðisflokksins að stjórn borgarinnar. Ekki hörmuðu þau illa þefjandi dómararáðningu fyrir nokkrum vikum þar sem öllum er ljóst að var harkalega brotið gegn „þeim almennu reglum sem gilda um lýðræðislega meðferð mála í þjóðfélaginu“, og ég hef heldur ekki heyrt að þar ríki óánægja með REI-málið þar sem var mjög augljóslega brotið gegn „þeim almennu reglum sem gilda um lýðræðislega meðferð mála í þjóðfélaginu.“ Við þurfum ekki einu sinni að minnast á lýðræðislega meðferð mála í aðdraganda Íraksstríðsins. Þá á ég á erfitt með að skilja hvers vegna þau fagna endurkomu meirihluta sem starfaði svo skarpt gegn „sjálfstæðisstefnunni“ og oft í anda forræðishyggju – í alvöru, hver nema gamaldags kommúnisti lætur sér detta í hug að banna sjálfstæðri stofnun að selja kaldan bjór? Heimdallur þarf augljóslega (eins og Ólafur Stephensen og aðrir Sjálfstæðismenn sem hafa ekki meiri reisn en svo að sætta sig við hvað sem er svo lengi sem þeirra menn eru við stýrið) að rifja upp hvað lýðræði er og út á hvað það gengur.

***

Og jújú, það er vissulega dónalegt að segja Ólafi að hann sé enginn fokking borgarstjóri og hann ætti frekar að fara heim – en ég held að merkingin sé samt ansi nærri því sem flaug í gegnum huga flestra sem heyrðu af meirihlutaskiptunum, að Sjálfstæðismönnum og fjöldamörgum Frjálslyndum meðtöldum.

(Greinin er leiðari febrúarblaðs Stúdentablaðsins)

:: Atli 11:30 [+] :: ::
...

Þetta var hrikalegt í Ráðhúsinu í dag maður. Ekkert nema athyglissjúkt lið sem þrífst beinlínis á svona ósmekklegum uppákomum; þannig getur það nefnilega troðið sér inn í blöðin og sjónvarpið og notið sviðsljóssins, enda veit það ekkert betra. Heldur fólk í alvöru að það geti haft einhver áhrif á samfélagið sem það býr í? Hvílík klikkun.

:: Atli 21:31 [+] :: ::
...

Ég hef heldur betur flækst inn í sérkennilega atburðarás. Skyssan fyrirskipaði semsagt stuðningsmanni sínum í liði Borgarholtsskóla að taka upp nektarmynd af kvenkyns frummælandanum í liði andstæðingsins. Myndin var þriggja ára gömul, tekin í góðu pottapartíi og hafði ratað í hendur liðsins eftir að stafrænni myndavél var stolið í partíi fyrir nokkru síðan.

Það bókstaflega drýpur af þessu dómgreindarleysið og skeytingarleysið, og þetta er MORFÍS til háborinnar skammar. Ég hef því ritað bréf til framkvæmdastjórnarinnar (sjá hér að neðan) þar sem ég fer fram á að Skyssan missi leyfi sitt til að dæma, auk þess sem að stjórnin mælist til þess að hann verði ekki ráðinn aftur sem þjálfari. Keppandann ætti enn fremur að ávíta harkalega. Vonandi skapast þannig fordæmi svo atburður af þessu tagi geti ekki endurtekið sig.

Ég er að fá fólk sem hefur verið viðriðið MORFÍS á undanförnum árum til að kvitta á bréfið með mér. Það hefur gengið mjög vel. Ef þú ert keppandi, fyrrum keppandi, dómari eða þjálfari máttu senda mér tölvupóst á bollason [hjá] gmail.com með fullu nafni, skólanum sem þú varst í og á hvaða árum þú kepptir. Ég sendi svo bréfið í vikulok.

Mælsku- og rökræðukeppni framhaldsskóla á Íslandi
b.t. Skapta Jónssonar formanns og framkvæmdastjórnar

Í frétt í DV í dag er sagt frá því að stuðningsmaður ræðuliðs Borgarholtsskóla, Jóhann Ingi Guðjónsson, hafi ráðist með óafsakanlegum hætti á Tinnu Rut Bjarnadóttur, frummælanda Fjölbrautaskólans í Breiðholti, þegar hann dró upp ljósmynd af henni án klæða og sýndi viðstöddum í viðureign skólanna 18. janúar síðastliðinn. Fréttina hefur undirritaður fengið staðfesta frá fjöldamörgum sem sóttu keppnina.

Augljóst er að með þessu athæfi hefur Jóhann Ingi brotið gegn gr. 8.1 í lögum MORFÍS þar sem kveðið er á um að „verði keppandi eða skóli uppvís að því að brjóta gegn [...] venju eða góðu siðferði í keppni“ megi kæra brotið til framkvæmdastjórnar MORFÍS. Hér er þó um gríðarlega alvarlegt og ósiðsamlegt brot að ræða sem brýtur einnig í bága við ýmsar greinar XXV. kafla almennra hegningarlaga (sérstaklega 228. og 229. gr.), og kann jafnframt að gera Jóhann skaðabótaskyldan í samræmi við 26. gr. skaðabótalaga. Auk þess er ljóst að Jóhann Ingi hefur svert ímynd MORFÍS gríðarlega og áhrif þess eiga eflaust enn eftir að koma í ljós að fullu.

Keppendur í MORFÍS eru á eigin ábyrgð, í öllu falli þeir sem hafa náð 18 ára aldri, en nemendafélög framhaldsskólanna ráða til sín þjálfara með það fyrir augum að fá einhvern reynslumeiri sér til aðstoðar við undirbúning keppninnar. Því má segja að þjálfarar séu ráðnir fyrir sakir hæfni sinnar og dómgreindar. Þegar þeir sýna dómgreindarleysi á við það sem birtist 18. janúar sl. kveikir það alvarlegar spurningar um hæfni viðkomandi til að starfa með ungmennum á þessu sviði. Ljóst er að þjálfari Borgarholtsskóla, Ingvar Örn Ákason, hefur brugðist skyldum sínum rækilega og hvorki aðstoðað liðið við að semja og flytja málefnalegar né skemmtilegar ræður, nema lítillækkun af því tagi sem áhorfendur fengu að kynnast síðastliðinn föstudag sé skemmtun í augum þjálfarans.

Þar sem Ingvar Örn hefur brotið með jafnalvarlegum hætti gagnvart umbjóðendum sínum mælist undirritaður til þess að framkvæmdastjórn MORFÍS álykti gegn því að hann verði aftur ráðinn sem þjálfari, og enn fremur að Ingvar verði úrskurðaður vanhæfur sem dómari í ljósi dómgreindarleysis og fjarlægður af dómaralista MORFÍS til frambúðar.

Þá mælist ég til þess að Jóhann Ingi Guðjónsson verði ávíttur harkalega af framkvæmdastjórninni.

Með þessum hætti sýnir framkvæmdastjórn MORFÍS að henni er annt um keppnina og mun ekki líða siðferðisbrot af þessu tagi. Á næstu síðu má sjá lista með nöfnum ýmissa sem eru eða hafa verið viðriðnir MORFÍS á undanförnum árum og taka undir tillögurnar.

Með von um skjót viðbrögð,

Atli Bollason
fyrrum keppandi í MORFÍS
(MH, 2001-2004)

:: Atli 15:45 [+] :: ::
...

Ég styð þetta: http://www.petitiononline.com/nogbodid/petition.html

Undirskriftasöfnun gegn Ólafi F. sem borgarstjóra, manni með innan við 7000 atkvæði á bak við sig. Ábyggilega hægt að safna fleiri undirskriftum en það.

:: Atli 12:07 [+] :: ::
...

Steikt. Dagur B. fór vel af stað, og nú þarf Ólafur F. bara að bregða sér til útlanda eða fá flensu og þá verður skipt aftur. Það er út í hött að flokkur sem fengi ekki einusinni mann inn í dag eigi nú borgarstjórastólinn. Ég segi að það verði boðað til kosninga. Það er eina leiðin til að fá úr þessu skorið.

Plötur
Shugo Tokumaru: Night Piece / L.S.T.

:: Atli 19:26 [+] :: ::
...

Það eru heitar umræður á kómentakerfi Egils Helgasonar um íslam og íslamista og skopteikningar og ýmislegt annað. Rótin er greinasafnið Íslam með afslættisem kom út fyrir einni og hálfri viku og svo umfjöllun Egils í Silfri sínu í kjölfarið. Ég ætla ekki að hafa skoðun á þessu að svo stöddu - en - ég þykist þó viss um að á Íslandi gæti enginn listamaður/rithöfundur búið út verk sem myndi kalla á viðbrögð í líkingu við þau sem sáust þegar skopmyndirnar birtust. Kannski ber það vott um dvínandi siðferði en mér dettur ekki neitt í hug sem myndi beinlínis hneyksla mig, ég veit allavega að engin skopmynd, enginn útúrsnúningur væri þess megnugur. Ekkert er yfir það hafið að gera grín að því.

Það er helst að hatursfullar skoðanir eða viðhorf gætu hneykslað, en þær bera yfirleitt vott um heimsku, og það er miklu frekar vorkunn en hneykslan sem situr eftir.

:: Atli 16:30 [+] :: ::
...

Ég vakti aðeins fram á nótt við að horfa á kynningarræðu Steve Jobs á Macworld 2008. Þessi náungi er rosalegur, endurtekningarnar svo markvissar, byggingin á kynningunni allri, hvernig hann leiðir úr einu í annað. Og svo skiptir náttúrulega frekar miklu máli að vörurnar sem hann er að kynna eru ekkert djók. Nú bíðum við bara eftir því að iTunes verslunin nái til Íslands og þá mun öll afrþeyingarneysla taka nokkrum stakkaskiptum grunar mig.

En ég er ennþá maður hins efnislega ofar hinu stafræna.

Fékk í dag langþráða sendingu frá Tower Records í Japan (mjög fyndið að panta þar sem það er svona happaglappa hvaða upplýsingar eru aðgengilegar á ensku og hvað ekki) með öllum breiðskífum hins unga Shugo Tokumaru, en þær eru þrjár talsins. Hlakka til að ylja mér við þær næstu daga og vikur.

:: Atli 15:07 [+] :: ::
...

Þrátt fyrir snjóinn heldur boltinn áfram að rúlla.

Efst á baugi núna er að koma þriðja tölublaðinu mínu út, þ.e. fyrsta tölublaði 84. árgangs. Svo er Höllin að semja tónlist fyrir leikritið Fló á skinni sem verður frumsýnt 8. febrúar á Akureyri. Það gengur vel og við ljúkum verkinu nú um helgina. Svo hef ég rekið ýmislegt á undan mér sem ég þyrfti að taka við af meiri krafti bráðlega; ljúka þýðingunni á Landslagi, skrifa grein um gagnrýni, ábyrgð gagnrýnenda og fimm stjörnu vandann, sjá eitthvað af þessum frönsku bíómyndum.

***

Það er alveg merkilegt að hvorki Heimdallur né SUS hafi sent neitt frá sér vegna skipunar Þorsteins Davíðssonar í embætti héraðsdómara og segir kannski ýmislegt um afstöðu þessara ungu frelsissinna til frelsis og jafnræðis svona þegar allt kemur til alls. Það blasir við að skipunin er ekki í neinu samræmi við hæfi Þorsteins og að rök dómsmálaráðherra fyrir skipuninni eru engin nema „ég má skipa þann sem ég vil“ - eins og hann starfi í eigin umboði en ekki þjóðarinnar allrar. Fáránlegt - og með aðgerðarleysi sínu afhjúpa ungir sjálfstæðismenn eigin hræsni og hugsjónaleysi.

Plötur
The Jesus and Mary Chain: Psychocandy
The Magnetic Fields: Distortion
Vashti Bunyan: Lookaftering
Yeasayer: All Hour Cymbals

:: Atli 19:03 [+] :: ::
...