:: keipdúnkur atla bollasonar ::

:: laugardagur, nóvember 29, 2003 ::

Ég og Julian Casablancas erum góðir vinir. Allt frá því að Strokes komu til Íslands og léku fyrir Íslendinga, höfum við Julian, en þó aðallega Albert Hammond verið miklir félagar. Inní skáp á ég plakat þar sem þeir (allir) þakka mér fyrir vistina, og Julian heldur því fram að á Íslandi hafi hann fundið sjálfan sig. Sambærilegur kalíber minn og Julians birtist svo aftur í því að á jólaballi NFMH, sem haldið er í félagi við NFVÍ, mun hljómsveitin SAAB (m.a.) leika fyrir dansi. Ballið er á Broadway, en þar léku einmitt Strokes. Þannig munum við Julian hafa verið í svipuðu hlutverki á sama sviði von bráðar.

:: Atli 17:08 [+] :: ::
...

Já, believe it or not, Hnefi vizkunnar, þeas Ég, Orri og Kári; sigruðum barasta innanskólakeppnina í vísdómi og fróðleik, Meltu Pétur. Þetta veitir okkur hins vegar engin réttindi eða inngöngu í Gettu betur lið skólans, við fengum samt Heimspekisögu frá Háskólaútgáfunni. Frekar mikið gúddsjitt. Ég verð nú bara að játa að ég er yfir mig stoltur, átti ekki beinlínis von á því að komast langt í þessari keppni. Svona er þetta, maður kann barasta ýmislegt. Gaman að því að stjórn NFVÍ (ekki VIPD, Verzló Party Dept.) var stödd þarna og það vekur óneitanlega upp spurningar varðandi komandi jólaball...dadadaa. Jæja, rokk og ról og ef þið vitið um einhverjar geðveikt góðar jólaplötur þá megiði benda mér á þær.

:: Atli 21:44 [+] :: ::
...

a) Af hverju eru íslensk stjórnvöld svona miklir bláþörungar? Af hverju veittu þau ekki dúllulegu afgönsku hjónunum pólitískt hæli hér á Íslandi? Af hverju viljum við loka dyrum okkar fyrir fólki sem á erfitt?
b) Hnefi vizkunnar er kominn í úrslit Meltu Péturs. Sigruðum Steinmaster (eða e-ð svoleiðis) með 23 stigum gegn 17, minnir mig.
c) Ég er ekki frá því að ég sé kominn í smá jólafíling, er búinn að vera dáldið hérna heima að glamra á píanóið og syngja með „Chestnuts roasting on an open fire...“
d) Kíkið á þetta, listi Pitchforkmedia.com yfir 100 bestu plötur tíunda áratugarins.

:: Atli 17:11 [+] :: ::
...

Djöfuls harka er að vera á fyllerí að tala um hvað það væri mikið gúddsjitt að sjá Bob Dylan á sviði og skella sér svo bara daginn eftir til London að sjá kappann. Það kallar maður spontant hegðun. Sjá...

:: Atli 19:05 [+] :: ::
...

Helgin gerð upp
Á föstudaginn var dimisjón í MH. Flest atriðin voru ómerkileg dansatriði sem gleymast fljótt - en Svala mín í félagi við t.d. Kára og Ásgeir stigu á stokk í gervi hinna ýmsu karaktera úr Super Mario heiminum og léku auðskiljanlegan og einfaldan leikþátt sem vakti kátínu. Um kvöldið hitti ég þau svo og fékk mér bjór, dansaði, spjallaði, skellti mér á dimisjón-ballið og hafði gaman. Var þrátt fyrir það kominn heim fyrir kl. eitt, nokkuð í glasi.
Laugardagurinn fór að mestu í æfingu með leikfélagi NFMH. Um kvöldið sá ég Kill Bill, en hún var geðveikt góð - tekst að gera ofbeldi að list, eitthvað sem Matrix hefur mistekist. Að því loknu fór ég niður í stúdentakjallara og fékk mér bjór í félagi við samnemendur mína í FÍH og öðrum. Það er alltaf gaman og gærkvöldið engin undantekning þar á.
Í dag hef ég verið rólegur, fór í hjólatúr með Svölu, borðaði, hlustaði á Bítlana. ekki mikið meira.
Ein vika eftir af skólanum. Ég er orðinn gamall.

:: Atli 19:15 [+] :: ::
...

í dag
er himinninn vatn
og skýjin spegilmyndir snævi þakinna fjalla.

:: Atli 14:54 [+] :: ::
...

Ég trúi því varla sjálfur, en ég var veikur í gærdag, með hita, beinverki, höfuðverk o.s.frv. Þetta er í fyrsta sinn sem ég er veikur síðan í tíunda bekk. Þá var ég líka alveg veikur í fimm sex daga. Þá fékk ég nemendaráð í heimsókn til mín, þar sem ég var sveittur og myglaður á nærbuxunum með skítugt hár til að semja atriði fyrir árshátíðina. Atriðið varð svo frekar fyndið, snérist um sjálfsháð, það er alltaf fyndnast. Fór svo með Mömmu að leita uppi hvítan smóking og fann - í stærri kantinum reyndar. Fékk svo panodyl hjá Mömmu, tók eina kl 17., eina kl. 20 og eina kl. 23. Þannig var árshátíðin í 10. bekk, frekar heit og sveitt, en mjög skemmtileg. Ég endaði dansandi skyrtulaus, bara ber bringan undir hvítum jakkanum. Þá var bringan líka berari fatalaus en nú.
Núna var þetta þó bara einn dagur.
•••
Hnefi Vizkunnar (liðið mitt í innanskóla spurningakeppninni Meltu Pétur eða vertu leður?) komst í undanúrslit í dag gegn liðinu Byssupiss, en það sátu Ugla, Anna Tryggva og Ingimar. Bæði lið stóðu sig illa, sem helst má rekja til óvenju erfiðra hraðaspurninga. Fyrr höfðum við rústað liðinu Dübeldrive, eða eitthvað svoleiðis. Við erum að fara að vinna þetta. Tja.

:: Atli 17:37 [+] :: ::
...

Tveir góðir menn sem ég verð hreinlega að minnast á:

1) Byssan, aka Ingvar Örn Ákason, hættir lifi og limum til að verja hæfileika mína í ræðumennsku. Ég er honum þakklátur fyrir það. Við ættum að fá okkar neðan í því saman.
2) Finnur Guðmundsson, MHingur, sem hefur dvalið sl. mánuði í Frankaríki og sendi mér þetta líka ótrúlega skemmtilega póstkort um daginn. Finnur er toppgaur, hann þyrfti bara að byrja að drekka og þá yrði hann alveg pottþéttur.

:: Atli 21:46 [+] :: ::
...

Birgitta Haukdal er af mörgum misskilin, tel ég. Það hefur verið og er enn í tízku að kunna illa við eða þola ekki 'Gytte'. Þetta hef ég aldrei skilið, enda rosalega hugguleg stelpa þarna á ferð, augsýnilega mjög klár og í bestu sveitaballapoppsveit Íslands. Sá hana núna í Gísla Marteini, hún flutti fallegt lag á kassagítar og var í alla staði mjög heillandi. Enda líkar flestum ömmum og mömmum vel við hana, meðan gelgjum í eldri kantinum (á aldur við mig) þykir kúl að dissa hana. Gytte, ég fíla þig.

:: Atli 20:01 [+] :: ::
...

Við unnum Kvennó í gær með einhverjum 250 stigum. Sérkennilegast er þó að einn dómarinn dæmdi okkur 4 eða 5 stiga tap. Svoleiðis á varla að geta gerst, en svona er Morfís, full of surprises. Fólk er að tala um að við höfum verið undir getu, staðnaðir, ryðgaðir, o.s.frv. Það má vel vera, enda formið farið að taka nokkuð á þegar maður keppt um 15 keppnir. Ég vil sjá lið sem eru til í einhverjar ferskar pælingar, t.d. eitt umræðuefni fyrir hlé og annað eftir hlé; andstæða póla (d: Magn/Gæði) og ýmislegt svona. Jafnvel efni sem eru óræð, einsog Hvenær á að segja STOPP?. Fæstir eru til í svona áhættur, sem segir ýmislegt um þessa keppni. En mér fannst við ágætir, ekki jafn fyndnir kannski og við héldum, og í örlitlu svarabasli, en ég held það sé aðallega til komið vegna umræðuefnisins sjálfs. Kári brillaði, ekki leiðinlegt svona í seinustu keppni, og Goggi komst klakklaust frá sínu. Takk fyrir samstarfið strákar. Eftir keppnina héldum við uppteknum hætti og fórum á Mímisbar og drukkum kokkteila. Þar hittum við Gunnlaug Ástgeirsson íslensku- og sögukennara og spjölluðum við hann. Síðan var stefnan tekin á LA Café, þar sem var Partius Victorius. Mér fannst það frekar skemmtilegt, nóg af skemmtilegu fólki til að spjalla við. Endaði kvöldið svo í tómri íbúð á Bergstaðastræti ásamt Dóra DNA, Svölu, Jóa Alf-reð og Bjöllanum. Semi-pottþétt krú.
Við tekur margþættur lærdómur.

:: Atli 14:28 [+] :: ::
...

"What Key Signature are you?"
Ég var Eb dúr. Hann er nokkuð góður.
SAAB munu leika tvö til þrjú lög á undan Blúsbyltunni á fimmtudaginn.
Ég sá Skördí í gær. Býr hún ekki í Frakklandi?

:: Atli 18:56 [+] :: ::
...

Ég verð nú að játa að mér finnst svona frekar illa ráðið hjá Þorsteini Stephensen að hafa Muse tónleikana 10. des, þegar stærstur hluti þeirra sem myndu mæta eru í prófum. Ég fer allavega í Ísl503 daginn eftir.

:: Atli 16:43 [+] :: ::
...

Djöfuls skull.
Kom heim eftir tæpa 13 tíma uppí skóla og ætlaði að eiga rólega kvöldstund, en þá eru bara einhverjir punks að kveikja á rokeldspýtum fyrir utan hjá mér. Við nánari skoðun kom í ljós að þetta eru einhverjir félagar systur minnar, og hún er búin að fylla húsið af einhverjum útúr flippuðum 9. bekkingum.
•••
Fátt að frétta, nokkur góð fyllerí afstaðin síðan seinast, kannski aðallega þetta eftir fótboltamótið þar sem ég snéri illa á gæsluna og endaði svo heima hjá Oddi sem blandaði landa í ís klukkan fimm að morgni.
Allavega.
MH mæta Kvennó í 16-liða úrslitum Morfís föstudaginn 14. nóvember nk. Umræðuefnið er eftirfarandi: Væri tímaflakk mögulegt, ættum við þá að nýta okkur það? Sem er í raun nákvæmlega sama og einfaldlega Tímaflakk, en þetta var málamiðlun (upphaflega vildu Kvennó hafa: „Væri tímaflakk mögulegt, væri þá bráðnauðsynlegt að koma í veg fyrir það með öllum tiltækum ráðum?“) Þetta hefur lengi verið draumaefni hjá mér. Við verðum á móti. Reyndar kom í ljós við frekari athugun að það getur verið sjúklega flókið, en það bara rokkar hana aðeins upp. Þetta er alvöru úrslitaefni, „lots of in's, lots of out's, lots of strings in old duders head, you know?“. Þetta verður allavega skrítið og ég hvet fólk til að mæta uppí Kvennó kl. 20 eftir viku.
•••
Við Leó unnum Bjartsýnisverðlaun í lagasmíðakeppninni Óðríkur Algaula í gærkvöldi. (Nei, þetta eru ekki svona „djöfull eruði bjartsýnir“-verðlaun. Meira einsog bjartasta vonin). Það var gaman, átti ekkert von á neinum verðlaunum. Við fluttum lagið Orri, sem er þægileg stemma samsett úr gífurlegum bassa, mínímalískum tölvutakti, gítarplokki og klukkuspili. Einnig söng ég með sveitinni SAAB lagið Don't know what to do, sem er svona hrár metal-blús-rokkari. Dáldið einsog ef Led Zeppelin hittu AC/DC í partíi hjá Axl Rose. Snérist mest um lúkkið og kúlið og stuðið. Heppnaðist vel. Ég fékk að heyra það oft eftir keppnina að ég væri góður Robert Plant. Ekki leiðinlegt það.
•••
En nú eru það rólegheit. Þangað til í fyrramálið.

:: Atli 23:41 [+] :: ::
...